لاہور (نیوز ڈیسک) پاکستان کرکٹ بورڈ کے چیئرمین شہریار خان نے کہا ہے کہ زمبابوے کرکٹ ٹیم کی دورہ پاکستان آمد سے صرف پاکستان کو ہی نہیں بلکہ پوری دنیائے کرکٹ کو خوشی ہوئی ہے۔ اس سلسلے میں انگلش کرکٹ بورڈ کے سابق چیئرمین جائلز کلارک اور آئی سی سی چیئرمین این سری نواسن نے فون کیا ہے اور پاکستان میں کرکٹ کی بحالی پر مبارکباد دی ہے۔ چیئرمین پی سی بی نے سری لنکن ٹیم کی آمد کا عندیہ بھی دیا۔ انہوں نے کہا کہ سری لنکن کرکٹ بورڈ کی عبوری کمیٹی کے سربراہ سدھاتھ ویٹیمنی بھی زمبابوے کیخلاف سیریز کے باقی ماندہ میچز دیکھنے پاکستان آئیں گے۔ پی سی بی کا ارادہ ہے کہ وہ انہیں بھی سیکیورٹی امور پر تفصیلی بریفنگ دے تاکہ سری لنکن ٹیم کے دورہ پاکستان کی راہ ہموار ہوسکے۔ چیئرمین پی سی بی نے بھارتی میڈیا کو تنقید کا نشانہ بناتے ہوئے کہا کہ وہ منفی خبریں پھیلا کے معاملے میں الجھاو¿ پیدا کررہا ہے۔ ہم نے بی سی سی آئی کو دورہ پاکستان کی دعوت دے رکھی ہے اور ہم بورڈ کے سیکرٹری انوراگ ٹھاکر کی جانب سے جواب کا انتظار ہے۔ شہریار خان نے امید ظاہر کہ کہ آئندہ برس تک جو بھی ٹیم آئی اس کے ساتھ فل سیریز کھیلی جاسکے گی۔ انہوں نے کہا کہ آئندہ سیریز میں وہ کراچی، فیصل آباد، ملتان، میرپور اور مظفرآباد میں میچز کیلئے بھی ٹیموں کو رضامند کرنے کی کوشش کریں گے۔ شہریار خان کے مطابق آئندہ ماہ آئی سی سی اجلاس میں زمبابوے کے دورے کی ڈاکیومینٹری پیش کی جائے گی تاکہ پاکستان کے حوالے سے تاثر کو بدلا جاسکے۔