لاہور (نیوزڈیسک) پاکستان اور زمبابوے کی کرکٹ ٹیموں کے مابین دو ٹی ٹونٹی میچوں کی سیریز کا دوسرا ڈے اینڈ نائٹ میچ آج ( اتوار ) کو قذافی اسٹیڈیم لاہور میں کھیلا جائیگا ، میچ شام 7بجے شروع ہو گا ، اس حوالے سے سکیورٹی سمیت دیگر تمام انتظامات مکمل کر لیے گئے ہیں ، پہلے ٹی ٹونٹی میچ جیتنے کی وجہ سے پاکستان کو دو میچوں کی سیریز میں 1-0کی برتری حاصل ہے اور زمبابوے کے خلاف سیریز میں کلین سویپ کے لئے پاکستان کو آج کا میچ جیتنا ہو گا،پاکستان اور زمبابوے کے مابین آج اتوار کی شام قذافی سٹیڈیم لاہور میں ہونے والے دوسرے ٹی ٹونٹی میچ میں ایمپائرنگ کے فرائض احسن رضا اور احمد شہاب سر انجام دیں گے ۔ٹی وی ایمپائر شوزیب رضا ،چوتھے ایمپائر خالد محمود ،ریفری اظہر خان ،سکورر حمید اظہر اور نجم مسعود ہوں گے ۔تفصیلات کے مطابق پاکستان میں 6سال کے طویل عرصے کے بعد انٹرنیشنل کرکٹ بحال ہو گئی ہے جس پر شائقین کرکٹ میں خوشی کی لہر دوڑ گئی ہے ۔ جمعہ کے روز کھیلے گئے پاکستان اور زمبابوے کے درمیان ٹی ٹونٹی سیریز کے پہلے ٹی ٹونٹی میں شائقین کی ایک بڑی تعداد نے میچ دیکھنے کے لئے قذافی اسٹیڈیم لاہور کا رخ کیا ۔ پاکستان اور زمبابوے کی کرکٹ ٹیموں کے مابین دو ٹی ٹونٹی میچوں کی سیریز کا دوسرا میچ آج ( اتوار ) قذافی اسٹیڈیم لاہور میں کھیلا جائے گا جس کے لئے دونوں ٹیموں کے کپتان پرعزم ہیں ۔ سکیورٹی پلان کے مطابق کھلاڑیوں اور شائقین کے تحفظ کے لئے پولیس کے 9ہزار جوان سکیورٹی کے فرائض سرانجام دیں گے جن میں تمام ایس ایس پیز ، ایس پیز ،ایلیٹ پولیس، سپیشل برانچ اور دیگر قانون نافذ کرنے والے اداروں کے اہلکار شامل ہوں گے جبکہ کسی بھی نا خوشگوارصورتحال سے نمٹنے کے لیے 2000 اہلکاروں کو سٹینڈ بائی رکھا گیا ہے ۔ اس کے علاوہ اسٹیڈیم کی ہیلی کاپٹرز کے ذریعے فضائی نگرانی بھی وقفے وقفے سے جاری رہے گی ۔ قذافی سٹیڈیم سے ملحقہ نشتر پارک سپورٹس کمپلیکس کے آس پاس 100 سی سی ٹی وی کیمرے بھی لگائے گئے ہیں جہاں سے 24 گھنٹے صورتحال کی مانیٹرنگ کی جا رہی ہے ۔پاکستان کو دو ٹونٹی میچوں کی سیریز میں 1-0سے برتری حاصل ہے ۔ آج کا میچ پاکستان جیتتا ہے تو وہ زمبابوے کے خلاف کلین سوئپ کرتے ہوئے سیریز میں فتح حاصل کرے گا جبکہ زمبابوے کی ٹیم کی جیت کی صورت میں ٹی ٹونٹی میچوں کی سیریز برابر ہوجائے گی ۔ اس حوالے سے قومی کرکٹ ٹیم کے کپتان شاہد خان آفریدی نے کہا ہے کہ ٹی ٹونٹی میچ میں کس بھی ٹیم کی جیت کے بارے میں یقینی کہنا مشکل ہوتا ہے کیونکہ ٹیسٹ میچز میں ٹیمیں کم بیک کرسکتی ہیں لیکن پہلا ٹی ٹونٹی میچ جیتنے کی وجہ سے قومی ٹیم کا مورال بلند ہے اور دوسرا ٹی ٹونٹی میچ بھی جیت کر سیریز میں 2-0سے کامیابی حاصل کریں گے ۔انہوں نے کہا کہ قومی ٹیم کے نئے کھلاڑیوں سے بہت توقع ہے اور امید ہے کہ آج کے میچ میں بھی کامیابی حاصل کریں گے ۔ جبکہ زمبابوے کرکٹ ٹیم کے کپتان ایلٹن چکمبورا کا کہنا ہے کہ کرکٹ میں یقین سے کچھ نہیں کہا جاسکتا تاہم تمام کھلاڑی بہترین پرفارمنس کامظاہرہ کرکے مثبت نتائج لانے کی کوشش کریں گے اورزمبابوے ٹیم دوسرے ٹی ٹونٹی میچ میں کم بیک کرے گی