لاہور(نیوزڈیسک) دورہ بنگلہ دےش کےلئے قومی سکواڈ میں شامل ہونے والے فواد عالم نے اظہر علی کو اچھا کپتان قرار دیا ہے اور کہا ہے کہ دورہ بنگلہ دیش کے دوران تمام سینئر اور جونیئر کھلاڑی انہیں سپورٹ کریں گے اور قومی ٹیم بہترین کارکردگی کا مظاہرہ کرے گی۔
لاہور میں میڈیا سے گفتگو کرتے ہوئے فواد عالم کا کہنا تھا کہ بنگلہ دیش کے خلاف اس کے ملک میں کھیلنا آسان نہیں ہوگا تاہم پوری ٹیم بھرپور عزم کے ساتھ میدان میں اترے گی اور سیریز میں بہترین کارکردگی دکھانے کی کوشش کریں گے۔ ایک سوال کے جواب میں ان کا کہنا تھا کہ دورہ بنگلہ دیش کے دوران تجربہ کار کھلاڑی یونس خان سمیت دیگر کھلاڑیوں کے پاس اچھی کارکردگی دکھانے کا بہترین موقع ہے۔ فواد عالم نے کہا کہ ٹیم سے باہر ہونے کے بعد فٹنس پر توجہ دے رہا ہوں اور اب بھی ٹیم کی ضرورت کے مطابق کھیلنے اور بڑی پارٹنر شپ بنانے کی کوشش کروں گا۔