لاہور(نیوزڈیسک)پاکستان کرکٹ ٹیم مڈل آرڈر بیٹسمن فواد عالم نے کہا ہے کہ دورہ بنگلہ دیش نئے کھلاڑیوں کے لئے اچھا موقع ہے کہ وہ کارکردگی دکھا کر ٹیم میں جگہ پکی کریں، انہوں نے کہا کہ بطور پلیئر وہ کپتان اظہر علی کو مکمل سپورٹ کریں گے۔ قذافی سٹیڈیم میں میڈیا سے گفتگو کرتے ہوئے فواد عالم نے کہا کہ اظہر علی کو پی سی بی نے کپتان مقرر کیا ہے اور انہیں پوری ٹیم کی سپورٹ حاصل ہے۔ انہوں نے کہا کہ ٹیم میں شامل بہت سے لڑکے نئے ہیں لیکن ہم سب ڈومیسٹک کرکٹ میں ایک ساتھ کھیلتے آئے ہیں، اس لئے اچھا ماحول ہے۔ انہوں نے کہا کہ ہم سب دورہ بنگلہ دیش کی بہترین تیاری کر رہے ہیں، ہمارا کوچنگ اسٹاف ہمیں جو کچھ کرنے کو کہتا ہے اس پر عمل کرنے کی پوری کوشش کرتے ہیں۔ انہوں نے کہا کہ دورہ بنگلہ دیش میں اچھی کارکردگی دکھاﺅں گا۔ میرا کھیلنے کا اپنا سٹائل ہے۔ میچ کے دوران جیتنے چھکے چوکے بھی مار لیں لیکن سنگلز اور ڈبلز لینا ضروری ہوتا ہے کیونکہ انہیں سے اننگز بلٹ ہوتی ہے۔ انہوں نے کہا کہ میچوں کے دوران جتنا موقع ملے گا اچھا پرفارم کروں گا۔ کوشش ہو گی کہ ٹیم کی ضرورت ہے حساب سے اننگز کھیلوں۔
انہوں نے نئے لڑکوں کے حوالے سے کہا کہ نئے لڑکوں کے پاس بہت اچھا موقع ہے۔ ٹیم میں اس وقت ہر ڈیپارٹمنٹ میں نئے لڑکے ہیں اور سب کے پاس بہترین موقع ہے کہ وہ اچھی کارکردگی دکھائیں اور ٹیم میں اپنی جگہ پکی کریں۔