لاہور (نیوزڈیسک) پاکستان کے سابق کرکٹر سکندر بخت نے کہا ہے کہ مصباح الحق پانچ سال سے کپتانی کر رہے ہیں کچھ تو ذمہ داری قبول کریں۔ تفصیلات کے مطابق مصباح الحق کی پریس کانفرنس پر ردعمل کا اظہار کرتے ہوئے سکندر بخت کا کہنا تھا کہ ماضی میں قومی ٹیم ورلڈکپ نہیں جیت سکی تو اس کا یہ مطلب نہیں کہ مستقبل میں بھی نہیں جیتنا۔ ماضی کو بھلا کر محنت کرنی چاہئے اور مصباح الحق پانچ سال سے ٹیم کے کپتان ہیں وہ کچھ تو ذمہ داری قبول کریں۔
ایک سوال کے جواب میں سکندر بخت کا کہنا تھا کہ مصباح پر ذمہ داری اس لئے عائد ہوتی ہے کہ وہ 5 سال سے کپتان ہیں اور کپتان کا کام ٹیم کو بنانا اور چلانا ہوتا ہے۔ اگر وہ 5 سال میں ایسا نہیں کر سکتے تو اس کی ذمہ داری تو قبول کریں۔انہوں نے مزید کہا کہ ورلڈکپ کے میچز میں یاسر شاہ کو کھلا کر بڑا باﺅلر بنانے کے بجائے حارث سہیل سے باﺅلنگ کرا کر اس کا وقت ضائع کیا گیا۔ جنوبی افریقہ کی نمائندگی کرنے والے پاکستانی نژاد عمران طاہر اگر پاکستان میں رہتے تو زندگی بھر انٹرنیشنل کرکٹ نا کھیل پاتے لیکن جنوبی افریقہ نے انہیں موقع دیا اور باﺅلر بنا لیا۔