لاہور (نیوز ڈیسک)ورلڈ کپ میں شکست کے بعد قومی کرکٹ ٹیم کے نئے کپتان کیلئے محمد حفیظ ‘احمد شہزاد ‘ وہاب ریاض ‘عمر اکمل اور سعید اجمل کے نام زیر غور ہیں۔ ہفتہ کو زرائع کے مطابق پاکستان کرکٹ بورڈ کے چیئرمین شہریار خان اور مینجمنٹ کمیٹی کے چیئرمین معروف اینکر نجم سیٹھی کے درمیان نئے کپتان کے حوالے سے رابطہ ہوا ہے جبکہ ورلڈ کپ میں شکست کی تحقیقات کرانے کیلئے ایک خصوصی کمیٹی کی تشکیل کیلئے کئی نام زیر غور ہیں۔ پی سی بی کے زرائع نے بتایا کہ نئے کپتان کیلئے سعید اجمل ‘ محمد حفیظ مضبوط امیدوار کے طو رپر سامنے آئے ہیں ۔ باؤلنگ ایکشن کلیئر ہونے کے بعد سعید اجمل کو اس لحاظ سے سب سے زیادہ فیورٹ قرار دیا جا رہا ہے کہ قومی ٹیم میں وہ اس وقت غیر متنازعہ کھلاڑی شمار کئے جا رہے ہیں جو ماضی میں بھی کسی گروپنگ کا حصہ نہیں بنے جبکہ احمد شہزاد نے کوچ وقار یونس سے ساز باز کر کے محمد حفیظ کو ورلڈ کپ کے دوران وطن واپس بھجوانے میں اپنا کردار ادا کیا تھا جس کے بعد بعض سابق کرکٹرز نے یہ رائے دی تھی کہ وقار یونس نے محمد حفیظ کو کپتانی کی دوڑ سے باہر رکھنے کیلئے انہیں وطن واپس بھجوایا ہے اور وہ احمد شہزاد کو کپتان بنوانا چاہتے ہیں۔ دریں اثناء فاسٹ باؤلر وہاب ریاض جن کی کوارٹر فائنل اور جنوبی افریقہ کیخلاف عمدہ کارکردگی کے بعد نہ صرف دنیا بھر میں ان کی شہرت میں اضافہ ہوا ہے بلکہ کرکٹ بورڈ کی بعض اہم شخصیات کے درمیان غیر رسمی طور پر اس بات پر غو رکیا گیا ہے کہ اگر وہاب ریاض کو کپتان بنا دیا جائے تو وہ ایک فائٹر کے طور پر عمران خان کا متبادل ثابت ہو سکتے ہیں اور اگر ان کی بیٹنگ بہتر ہو جائے تو وہ اچھے آل راؤنڈر کپتان ثابت ہو سکتے ہیں۔ ان زرائع کے مطابق وہاب ریاض کے والد محمد ریاض جن کے حکمران جماعت کی اہم شخصیات کے ساتھ قریبی تعلقات ہیں اور اس وقت سب کھلاڑیوں میں سب سے زیادہ تعلیم یافتہ وہاب ریاض ہیں اور وہ ایچ ای سن کالج لاہور سے فارغ التعلیم ہیں اور ان کے والد کا شمار ملک کے معروف بزنس مینوں میں بھی ہوتا ہے ۔