کراچی (نیوزڈیسک)برطانوی میڈیا کے مطابق ایک جعلی کرکٹ تجزیہ نگار سابق پاکستانی ٹیسٹ کرکٹر بن کر برطانوی نشریاتی ادارے ”بی بی سی“ کے اسپورٹس مذاکرے میں شرکت کرتا رہا۔ ندیم عالم نامی یہ شخص نہ صرف بی بی سی ورلڈ، بی بی سی ایشیئن نیٹ ورک اور ریڈیو فائیو لائیو میں سابق پاکستانی کرکٹر ندیم عباسی بن کر شریک ہوتا رہا بلکہ مذاکرے میں شریک ہونے کی اسے ادائیگی بھی کی گئی۔وہ اپنی شناخت کے پول کھلنے تک سابق پاکستانی کرکٹر کے طور پر بات چیت میں شریک رہا۔ مذاکرے میں سابق بھارتی ٹیسٹ اوپنر آکاش چوپڑا بھی شریک تھے۔ندیم عالم نے اپنی ساری زندگی میں ویسٹ یارک شائر میں ہڈرز فیلڈ کی ہوم ٹیم کی طرف سے صرف ایک میچ کھیلا ہے۔عباسی کے وکی پیڈیا پیج کو بھی ندیم عالم نے چالاکی سے تبدیل کیا‘ عباسی کی بائیو گرافی میں لکھا ہے کہ وہ اب فری لانس صحافی ہیں اور بی بی سی ایشین اور ریڈیو فائیو لائیو میںباقاعدگی سے شرکت کرتے ہیں۔1989ءمیں پاکستان کی جانب سے تین ٹیسٹ کھیلنے والے ندیم عباسی نے غصے کا اظہار کرتے ہوئے نشریاتی ادارے سے مطالبہ کیا ہے کہ وہ اس معاملے کی باضابطہ تحقیق کرے۔ان کا کہنا تھا کہ اگر ندیم عالم اسے کہیں مل گیا تو وہ اسے تھپڑ رسید کریں گے۔اس نے ملک وقوم کا نام بدنام کیا ہے۔ چھیالیس سالہ ندیم عباسی راولپنڈی میں کوچنگ کے فرائض انجا م دے رہے ہیں۔ انہوں نے کہا کہ میں نے 1996 ءکے ورلڈ کپ کے دوران صرف ایک بار پاکستانی ٹی وی مذاکرے میں شرکت کی تھی۔ ندیم عالم نے اپنی اسپورٹس معلومات کا دفاع کرتے ہوئے کہا کہ وہ اسکوائش کے کھلاڑی ہیں۔آئندہ وہ ندیم عباسی بننے کا ڈھونگ نہیں کریں گے۔برطانوی نشریاتی ادارے نے اس صورت حال پر شرمندگی کا اظہار کرتے ہوئے ندیم عباسی سے معذرت کی ہے اور اس معاملے کی تحقیق کا آغاز کردیا ہے۔