ایڈیلیڈ (نیوز ڈیسک)پاکستان کرکٹ ٹیم کے سپن باﺅلنگ کوچ مشتاق احمد نے کہا ہے کہ موجودہ صورتحال میں یاسر شاہ کی ٹیم میں جگہ نہیں بنتی۔

تفصیلات کے مطابق ایڈیلیڈ میں میڈیا سے گفتگو کرتے ہوئے مشتاق احمد کا کہنا تھا کہ قومی ٹیم فاسٹ باﺅلرز پر زیادہ انحصار کرتی ہے اور جیسا کہ پچھلے تین میچوں میں فاسٹ باﺅلرز نے بہترین کارکردگی کا مظاہرہ کیا ہے اس لئے اس ٹیم کو چھیڑنا اور مزید تجربات کرنا خطرناک ثابت ہو سکتا ہے۔ ان کا کہنا تھا کہ سعید اجمل اور محمد حفیظ جیسے میچ ونرز کے ٹیم سے نکل جانے پر کوچ اور کپتان کیلئے ٹیم کا چناﺅ انتہائی مشکل تھا لیکن فاسٹ باﺅلرز نے شاندار کارکردگی کے باعث ان مشکلات میں کمی کی ہے۔ آئرلینڈ کے خلاف کن کھلاڑیوں کو کھلایا جائے گا کے سوال پر ان کا کہنا تھا کہ اس کا فیصلہ وکٹ اور گراﺅنڈ کی کنڈیشن دیکھنے کے بعد ہی کیا جائے گا۔

ایک صحافی نے سوال پوچھا کہ آئرلینڈ کی ٹیم فاسٹ باﺅلرز کو بہت اچھا کھیلتی ہے اور اسی وجہ سے بھارت نے آئرلینڈ کے خلاف میچ میں3 سپنرز کو کھلایا ، اس لئے کیا آپ کو نہیں لگتا کہ یاسر شاہ کو ٹیم کا حصہ ہونا چاہئے؟ تو مشتاق احمد کا کہنا تھا کہ کپتان اور کوچ کو ٹیم سلیکٹ کرنے کیلئے بہت غور کرنا پڑتا ہے ، اس میں کوئی شک نہیں کہ 1992ءکے ورلڈکپ میں سپنرز نے بہت اچھا کھیل پیش کیا تھا تاہم حالیہ ورلڈکپ میں صورتحال مختلف ہے اور جس طرح ٹیم پرفارم کر رہی ہے اس کو چھیڑنا اور مزید تجربات کرنا خطرناک ثابت ہو سکتا ہے جبکہ آخری تین میچوں میں قومی ٹیم کی کارکردگی کے بعد یاسر شاہ کی ٹیم میں جگہ نہیں بنتی۔