ایڈیلیڈ (نیوز ڈیسک) پاکستان کرکٹ ٹیم کے سابق کپتان اور سینئر بلے باز یونس خان نے کہا ہے کہ ورلڈکپ کے بعد کرکٹ سے ریٹائر ہونے کا فی الحال کوئی ارادہ نہیں ہے، جب تک دم ہے کرکٹ کھیلتا رہوں گا۔
ایڈیلیڈ میں غیر ملکی خبر رساں ادارے سے بات کرتے ہوئے یونس خان کا کہنا تھا کہ جب انہیں لگے گا کہ وہ کرکٹ کھیلنے کے قابل نہیں رہے تو وہ خود ہی ریٹائر ہو جائیں گے۔ کسی بھی ملک کے خلاف میچ سے ڈراپ ہونے سے متعلق سوال کے جواب میں یونس خان نے کہا کہ ”ڈراپ ہونے پر تکلیف ہونا خود میرے لئے ہی نقصان دہ ہے، میری سوچ یہ ہے کہ پاکستان ٹیم جیتے، چاہے میں کھیلوں یا نہ کھیلوں“۔
ان کا مزید کہنا تھا کہ وہ یہ نہیں جانتے کہ بلے باز کارکردگی کیوں نہیں دکھا رہے لیکن یہ سچ ہے کہ ٹیم محنت کر رہی ہے اور قوی امید ہے کہ اپنے آخری پول میچ اور اگلے مرحلے میں پرفارم کرے گی۔ ان کا کہنا تھا کہ ٹیم ہر میچ کو آخری سمجھ کر کھیل رہی ہے اور ان کی بھرپور کوشش ہے کہ اتوار کو آئرلینڈ کوشکست دے کر کوارٹر فائنل کھیلیں اور پھر سیمی فائنل اور فائنل میں پہنچ کر ورلڈ کپ جیتیں۔ انضمام الحق جیسے بلے باز کی ٹیم میں عدم شمولیت سے متعلق سوال کے جواب میں یونس خان نے کہا کہ ”ٹیم میں احمد شہزاد، عمر اکمل اور حارث سہیل کی شکل میں ایسے بلے باز موجود ہیں جو کہ میچ والے دن اچھا کھیل کر ٹیم کو فتح دلا سکتے ہیں لیکن یہ بھی یاد رکھیں کہ 1992ءمیں کئی میچوں کے دوران تو انضمام بھی پرفارم نہیں کر پائے تھے۔