ہیملٹن(نیوز ڈیسک) نیوزی لینڈ کی کرکٹ ٹیم کے کپتان اور مایہ ناز بلے باز برینڈن میکولم نے کہا ہے کہ بنگلہ دیش کو اپنے پول کے آخری میچ میں شکست دے کر رواں ورلڈ کپ میں اپنی ٹاپ پوزیشن برقرار رکھیں گے۔ انہوں نے کہا کہ انکی ٹیم مکمل طور پر فٹ اور بھر پور فارم میں ہے اور بنگلہ دیش کو بھی اپنے پول بی کے چھٹے اور آخری میچ میں شکست دیکر میگا ایونٹ میں ناقابل شکست رہنے کے اعزاز کو برقرار رکھیں گے ۔ نیوزی لینڈ اور بنگلہ دیش کی ٹیمیں رواں ورلڈ کپ کے اہم میچ میں (آج) جمعہ کو ہیملٹن کے مقام پر پنجہ آزما ہونگی۔ کیویز ٹیم مسلسل پانچ میچ جیت کر گروپ بی میں ٹاپ پر موجود ہے، بنگلہ دیش کی ٹیم پانچ میں سے تین میچز جیت چکی ہے جبکہ اس کو ایک میچ میں شکست کا سامنا کرنا پڑا ہے اور ایک میچ بارش کی نظر ہوگیا تھا۔ کیویز قائد برینڈن میکولم نے کہا کہ ہر میچ کی طرح یہ مقابلہ بھی ہمارے لئے اہم ہے، کوشش ہو گی کہ عمدہ کارکردگی کا مظاہرہ کر کے گروپ بی میں ٹاپ پوزیشن برقرار رکھیں۔ پہلے پانچ میچوں میں کھلاڑیوں نے کھیل کے تینوں شعبوں میں بہترین کھیل پیش کرتے ہوئے ٹیم کو مسلسل پانچ میچوں میں کامیابی دلائی ہے، امید ہے کہ کھلاڑی بنگالی ٹیم کے خلاف میچ میں بھی عمدہ کارکردگی کا مظاہرہ کر کے ٹیم کو مسلسل چھٹے کامیابی دلانے میں کردار ادا کریں گے۔ واضح رہے کہ دونوں ٹیموں کے درمیان ورلڈ کپ کا 37 واں میچ آج جمعہ کو ہیملٹن کے مقام پر کھیلا جائیگا۔