ہملٹن (نیوز ڈیسک) بنگلہ دیش کرکٹ ٹیم کے کوچ چندیکا ہتھورا سنگھا نے کہا ہے کہ ورلڈ کپ کوارٹر فائنل میں پہنچنے کے بعد ٹیم کا مورال بلند ہے، کھلاڑی نیوزی لینڈ کے چیلنج سے نمٹنے کیلئے تیار ہیں۔ بنگلہ دیش نے انگلینڈ کو شکست دے کر عالمی مقابلوں کی تاریخ میں پہلی بار کوارٹر فائنل تک رسائی حاصل کی تھی۔ اپنے ایک بیان میں بنگال ٹائیگرز ٹیم کے کوچ نے کہا کہ انگلینڈ کے خلاف فتح کے بعد کھلاڑیوں کا اعتماد بڑھا ہے جس کا کیویز کے خلاف میچ میں فائدہ ہو گا، کھلاڑی کیویز سے خوف زدہ نہیں اور ڈٹ کر مقابلے کیلئے تیار ہیں۔ انہوں نے کہا کہ کیویز ہمیشہ ہوم گراؤنڈ پر خطرناک حریف ثابت ہوئی ہے اور اسے اس کی سرزمین پر زیر کرنا آسان نہیں ہو گا تاہم اگر کھلاڑی جارحانہ حکمت عملی کے تحت کھیل پیش کرنے میں کامیاب ہوئے تو ہماری ٹیم جیت سکتی ہے۔