ایڈیلیڈ (نیوز ڈیسک) پاکستانی ٹیم کی گیارہویں آئی سی سی ورلڈ کپ کرکٹ ٹورنامنٹ میں آئرلینڈ کے خلاف شیڈول آخری میچ کیلئے تیاریاں زوروشور سے جاری ہیں۔ دونوں ٹیمیں 15 مارچ کو ایڈیلیڈ کے مقام پر آمنے سامنے ہوں گی، یہ میچ دونوں ٹیموں کیلئے اہمیت کا حامل ہے اور جیتنے والی ٹیم کوارٹر فائنل میں جگہ بنا لے گی اسلئے ماہرین کرکٹ نے دلچسپ مقابلے کی توقع کی ہے۔ گرین شرٹس نے ابتدائی دو میچوں میں شکستوں کے بعد مسلسل تین فتوحات حاصل کر کے میگا ایونٹ میں جاندار کم بیک کیا ہے اور مضبوط پروٹیز کو شکست دینے کے بعد پاکستانی ٹیم کو آخری میچ کیلئے فیورٹ قرار دیا جا رہا ہے تاہم دوسری جانب آئرش ٹیم بھی کالی آندھی کو اپ سیٹ شکست دے چکی ہے اسلئے اسے آسان حریف تصور نہیں کیا جا سکتا۔ آئرلینڈ نے ویسٹ انڈیز کے خلاف 300 سے زائد رنز کا ہدف حاصل کیا تھا۔ عالمی مقابلوں کی تاریخ میں آئرلینڈ کی ٹیم تین بار اپ سیٹ کر چکی ہے، 2003ء میں آئرلینڈ نے پاکستان کو ہرایا تھا، 2011ء میں انگلینڈ کے خلاف کامیابی سمیٹی تھی اور 2015ء میں کالی آندھی کو زیر کیا۔ آئرش طوفان سے نمٹنے کیلئے پاکستانی کھلاڑیوں نے تیاریاں شروع کر دی ہیں اور تیسرے روز بھی بھرپور پریکٹس کی، نیٹ سیشن میں بیٹنگ، باؤلنگ کے علاوہ فیلڈنگ کے شعبے میں خصوصی طور پر توجہ دی گئی کیونکہ پاکستان کی فیلڈنگ ہمیشہ تشویشناک رہی ہے۔ واضح رہے کہ دونوں ٹیمیں تین، تین میچز جیت کر گروپ بی میں پوائنٹس ٹیبل پر بالترتیب تیسرے اور چوتھے نمبر پر موجود ہیں۔