سڈنی(نیوزڈیسک) بھارتی بلے باز سچن ٹنڈولکر نے ایسوسی ایٹ ٹیموں کی حمایت کرتے ہوئے آئی سی سی کے اس فیصلے کی مخالفت کی ہے جس کے تحت ورلڈ کپ 2019 میں ٹیموں کی تعداد کم کرکے 10 تک محدود کرنے کی تجو یز پیش کی گئی ہے۔آسٹریلیا کے شہر سڈنی میں ہونیوالی ایک تقریب میں ورلڈ کپ سفیر کی حیثیت سے موجود بھارتی بلے باز ٹنڈولکر نے کہا کہ آئی سی سی ٹیموں کی تعداد کم کرنے کے بجائے کرکٹ کو وسعت دینے کے بارے میں سوچے ، انہوں نے کہا کہ آئندہ ورلڈ کپ میں 25 ٹیموں کی شمولیت کھیل کیلئے ایک بہتر قدم ہوگا۔ انہوں نے کہا کہ مکمل رکن ممالک اپنی اے ٹیموں کیساتھ ایسوسی ایٹ ٹیموں کو بھی کھیلنے کے مواقع فراہم کریں تاکہ چھوٹی ٹیموں کے حوصلے بلند ہو سکیں۔سچن ٹنڈولکر نے آئی سی سی کی پیش کردہ تجویز پر مایوسی کا اظہار کرتے ہوئے کہا کہ وہ اس سے اتفاق نہیں کرتے بلکہ ان کی خواہش ہے کہ کرکٹ کا کھیل پوری دنیا میں پھیل جائے۔انہوں نے کہا کہ آئرلینڈ جیسی دیگر چھوٹی ٹیمیں ہر ورلڈ کپ میں اپ سیٹ کرتی ہیں۔ اگر ان ٹیموں کو موثر پلیٹ فراہم کیا جائے تو وہ اچھی کردگی کا مظاہرہ کرسکتی ہیں۔