کراچی (نیوز ڈیسک) پاکستان کرکٹ ٹیم کے کھلاڑی کامران اکمل نے شعیب اختر کے بھارتی ٹی وی پروگرام میں انٹرویو پر ردعمل کا اظہار کرتے ہوئے کہا کہ سابق فاسٹ باﺅلر دوسروں پر الزام تراشی سے پہلے اپنے گریبان میں جھانکیں۔ کامران اکمل کا کہنا تھا کہ شعیب اختر نے 2011ءکے دورہ نیوزی لینڈ کے دوران کرائسٹ چرچ میں کھیلے گئے میچ میں اختتامی اوور کرانے سے انکار کر دیا تھا، وہ پہلے اپنے گریبان میں جھانکیں۔ انہوں نے مزید کہا کہ شعیب اختر نے اپنے پورے کیرئیر میں صرف 48 ٹیسٹ ہی کھیلے ہیں اور اس کی کوئی تو وجہ ہو گی۔
واضح رہے کہ شعیب اختر چند روز قبل کے معروف کامیڈی شو ”کامیڈی نائٹ ود کپل“ میں شریک ہوئے اور قومی کرکٹرز کا مذاق اڑانے کیساتھ ساتھ پاکستان کرکٹ بورڈ (پی سی بی) کے موجودہ چیئرمین شہریار خان اورسابق چیئرمین نجم سیٹھی کو بھی آڑے ہاتھوں لیتے رہے۔ پروگرام کے دوران ایک موقع پر شعیب اختر نے کہا کہ پاکستانی کرکٹ ٹیم کو آج تک 41 سال سے کم عمر کا کوئی کپتان نہیں ملا۔ واضح رہے کہ قومی کرکٹ ٹیم کے کپتان مصباح الحق کی عمر 41 سال ہے۔