لاہور  پنڈلی کی تکلیف کے باعث ورلڈ کپ 2015سے باہر ہونیوالے پاکستان ٹیم کے مایہ ناز آل راؤنڈر محمد حفیظ نے انکشاف کیا ہے کہ انہیں نکالنے کیلئے پہلے ہی منصوبہ بندی کرلی گئی تھی پاکستان کے مشرقی صوبے پنجاب کے دارالحکومت لاہور کے قذافی اسٹیڈیم میں صحافیوں سے گفتگو کرتے ہوئے انہوں نے کہاکہ میری انجری 2ہفتوں میں ٹھیک ہونی تھی لیکن ٹور کمیٹی نے مجھے نکالنے کا فیصلہ پہلے ہی کردیا تھا ان کے بقول مینجمنٹ نے مجھے بتایا کہ آپ کو ورلڈ کپ سے نکالا جارہا ہے اور ہم متبادل کھلاڑی کو بلو ارہے ہیں محمد حفیظ کا کہنا تھا کہ میں نے ٹیم مینجمنٹ کا فیصلہ یہ سوچ سمجھ کر قبول کیا کہ یہ پاکستان کے حق میں بہتر ہوگا مینجمنٹ نے جو بھی فیصلہ کیا سوچ سمجھ کر کیا ہوگا نامور آل راؤنڈر کا یہ بھی کہنا تھا کہ ورلڈ کپ کی تیاریوں کیلئے 4سال سے ذہنی اور جسمانی طور پر تیاری کی میگا ایونٹ میں شرکت نہ کرنے کا افسوس ہے انہوں نے مزید کہاکہ میرے اور کرکٹ بورڈ کے درمیان کسی بھی قسم کا تناؤ یا تنازع نہیں ہمیشہ پاکستان ٹیم کے مفاد کو مد نظر رکھا ان کا کہنا تھا کہ اپنے کیرئیر کے حوالے سے پرامید ہوں ۔