نیویارک (مانیٹرنگ ڈیسک) شام اور عراق سمیت مشرق وسطیٰ کے متعدد ممالک جنگ کے شعلوں میں گھرے ہیں، لاکھوں تارکین وطن یورپ کا رْخ کررہے ہیں، اور پاکستان سمیت درجنوں ممالک دہشت گردی کے عفریت سے نبردآزما ہیں۔ ایسے میں یہ تصور کرنا مشکل ہے کہ دنیا میں کچھ ممالک آج بھی مکمل طور پر پْرامن ہیں۔
عالمی تحقیقاتی ادارے انسٹی ٹیوٹ فار اکنامکس اینڈ پیس نے عالمی امن کے متعلق سالانہ رپورٹ ’’گلوبل پیس انڈیکس 2016ء‘‘ جاری کردی ہے، جس کے مطابق دنیا بھر میں 10 خوش قسمت ملک ابھی بھی ایسے ہیں کہ جو نہ کسی جنگ میں ملوث ہیں، نہ انہیں دہشت گردی اور تارکین وطن جیسے مسائل کا سامنا ہے اور نہ ہی امن واستحکام کے لئے کوئی داخلی مسئلہ ہے۔ رپورٹ کے مطابق یہ خوش قسمت ممالک بوٹسوانا، چلی، کوسٹاریکا، جاپان، ماریشئیس، پانامہ، قطر، سوئٹزرلینڈ، یوراگوائے اور ویتنام ہیں۔اس رپورٹ میں یورپ کو دنیا کا پْرامن ترین خطہ اور مشرق وسطیٰ کو بدترین بدامنی کا شکار خطہ قرار دیا گیا ہے۔
شام اور عراق میں جاری جنگ اور لیبیا میں عدم استحکام و دہشت گرد تنظیموں کے پھیلاؤ کو اس خطے کی بے امنی کی بنیادی ترین وجہ قرار دیا گیا ہے۔ دنیا میں جاری جنگوں کے دوران ایک سال کے دوران ایک لاکھ 12ہزار افرادہلاک ہوئے ہیں، جن میں سے 75 فیصد صرف شام، عراق اور افغانستان میں لقمہ اجمل بنے ہیں۔دنیا کے پرامن ترین ممالک میں آئس لینڈ کا نمبر ایک بار پھر پہلا رہا ہے، جبکہ اس کے بعد بالترتیب ڈنماک، آسٹریا، نیوزی لینڈ اور پرتگال کا نمبر ہے۔ امن وامان کے حوالے سے شام دنیا کا بدترین ملک قرار پایا ہے۔