ایڈاباراک اپنے مریضوں کے جسم پر مساج کے لیے بیک وقت6 سانپ چھوڑ دیتی ہے اور اس کا معاوضہ 80 ڈالر وصول کرتی ہے۔ مساج کے بعد اس کے گاہک اپنے جسم میں نئی توانائی اور جوش محسوس کرتے ہیں۔ ایڈاباراک کا ایجاد کردہ یہ انوکھا مساج اسرائیل کے بعد انڈونیشیا اور اب تھائی لینڈ میں بھی مقبول ہوگیا ہے۔ سب سے پہلے انڈونیشیا کے دارالحکومت جکارتہ میں میں ایک’’ اسنیک مساج سینٹر‘‘ کھولا گیا ، جو بہت جلد ملک بھر میں مشہور ہوگیا۔
اس کے بعد جکارتہ سمیت انڈونیشیا کے مختلف شہروں میں اس قسم کے مساج سینٹرز کھلتے چلے گئے۔ جبکہ انڈونیشیا کے قریبی ملک تھائی لینڈ میں بھی یہ طریقہ مساج کافی شہرت اختیار کر گیا ہے۔ اسنیک مساج سینٹر کے مالکان کا دعویٰ ہے کہ یہ مساج جوڑوں کے درد ، پرانے زخم کی تکلیف اور نفسیاتی امراض سمیت کئی بیماریوں کا علاج ہے۔ اس لیے مقامی افراد کے علاوہ اب دور دراز کے ممالک سے بھی لوگ ان مساج سینٹرز کا رْخ کر رہے ہیں۔ ڈیلی میل کے مطابق اسکاٹ لینڈ سے تعلق رکھنے والا’’ آئن میکلین ‘‘ بھی اسنیک مساج کے شوقین ہیں۔