پاکستان کے صحرائے چولستان سے اُٹھنے والی ’ایکسکیوز می سر‘ کی ایک آواز پانچ ہزار بچوں کو درختوں کے نیچے سے اُٹھا کر کمروں میں لا رہی ہے۔ سورج کی تپش کے ساتھ اِن بچوں کی آنکھ مچولی ختم ہونے جا رہی ہے اور علاقائی تاریخ میں پہلی دفعہ چولستان کے بچوں کو اپنے گاؤں میں اپنے سکول مل رہے ہیں۔یہ آواز مصباح شاہین کی تھی۔ تقریباً ایک سال پہلے تعمیر ہونے والے اپنے پختہ سکول کے برآمدے کے سائے میں بیٹھ کر بیتے دنوں کو یاد کرتی ہیں۔ ’چھاؤں جس طرف جاتی تھی۔ ہم بھی اس کے پیچھے پیچھے جاتے تھے۔ وہاں بیٹھ کر پڑھتے تھے۔ ایک ہی کمرہ تھا۔ ایک درخت تھا۔ اُس کے نیچے ہم پڑھتے تھے۔ دھوپ لگتی تھی تو آنکھوں میں آنسو آ جاتے تھے کہ کیسے پڑھیں؟‘تب مصباح پانچویں جماعت میں تھیں۔ انھیں ڈاکٹر بننا ہے اس لیے سکول آنا پڑتا تھا۔مصباح کا سکول دراصل ایک غیر رسمی منصوبے کا حصہ تھا۔