حیدرآباد (این این آئی) بھارت میں آم کے باغات لیز پر لینے والے شخص نے کاروبار میں نقصان ہونے کی وجہ سے خودکشی کرلی۔بھارتی ٹی وی کے مطابق یہ افسوسناک واقعہ بھارت کی ریاست تلنگانہ کے سنگاریڈی ضلع کے ایک گائوں میں پیش آیا جہاں 38 سالہ ظفر پچھلے سال سے آم کے باغات لیز پر لے کر کام کررہا تھا۔گائوں والوں کی اطلاع کے مطابق ظفر نے اس سال بھی آم کے باغات لیز پر لیے لیکن اسے کافی نقصان اٹھانا پڑا کیونکہ کاروبار اس کی توقع کے مطابق نہیں چلا۔ظفر کی اہلیہ شاہین سلطانہ نے بتایا کہ کاروبار میں شدید نقصان ہونے کی وجہ سے ان کے شوہر بہت پریشان تھے۔رپورٹ میں بتایا گیا کہ ظفر نے گائوں کے نواحی علاقے میں ایک نیم کے درخت سے لٹک کر خودکشی کر لی۔مقامی سب انسپکٹر راجندر ریڈی نے بتایا کہ پولیس نے مقدمہ درج کرکے تحقیقات شروع کردی ہے۔