لاہور ( این این آئی)ڈائریکٹر جنرل پراونشل ڈیزاسٹر مینجمنٹ اتھارٹی فلائیٹ لیفٹیننٹ عمران قریشی کی زیر صدارت پی ڈی ایم اے کے کمیٹی روم میں اجلاس منعقد ہوا جس میں ڈائریکٹر (ساوتھ) حمید اللہ ملک کے علاوہ سول ڈیفنس، جنگلات، زراعت، تعلیم، لوکل گورنمنٹ، انڈسٹریز،
سی ڈی اے بہاولپور کے افسران، ایڈیشنل ڈپٹی کمشنرز رحیم یار خان و بھکر سمیت مختلف اضلاع کے افسران نے بذریعہ ویڈیو لنک شرکت کی۔اجلاس کے انعقاد کا مقصد موسم گرما کے دوران ممکنہ ہیٹ ویو اور شدید گرمی سے جنگلات میں کسی قسم کی آتشزدگی سے نبردآزما ہونا تھا۔ڈی جی پی ڈی ایم اے عمران قریشی نے ہدایت کی کہ متعلقہ ادارے ہیٹ ویو کے مضر اثرات سے بچائو اور محکمانہ انتظامات بارے پلان پی ڈی ایم اے کو جمع کروائیں ۔ اسی طرح محکمہ تعلیم طالبعلموں کے امتحانی شیڈول سے پی ڈی ایم اے کو آگاہ کرے۔انہوں نے کہا کہ موسمیاتی تبدیلیوں کی وجہ سے ہیٹ ویو اور گرمی کی شدت میں اضافے کا امکان ہے ۔گرمی کی شدت بڑھنے سے جنگلات میں آتشزدگی کا سامنا بھی کرنا پڑ سکتا ہے۔ ممکنہ خطرات کے پیش نظر محکمہ جنگلات فاریسٹ فائر سے بچاؤ کے لیے خصوصی ٹیمیں تشکیل دے کر جلد از جلد رپورٹ جمع کروائے۔انہوں نے کہا کہ حکومت کی ہدایت پر ہیٹ ویو سے بچاو کے لیے محکمہ صحت سمیت متعلقہ اداروں کو خصوصی ہدایات جاری کی جاچکی ہیں تاکہ انتظامات بروقت مکمل کیے جائیں اور شہریوں کے جان و مال کے تحفظ یقینی بنایا جا سکے۔اس موقع پر ڈائریکٹر (کوآرڈینیشن) پی ڈی ایم اے طارق محمود بخاری نے کہا کہ ہیٹ ویو سے بزرگ شہری اور بچے زیادہ متاثر ہو سکتے ہیں جس سے بچاو کے لیے شہریوں کو احتیاطی تدابیر پر عمل پیرا ہونا ہو گا۔انہوں نے کہا کہ ہیٹ ویو کے مضر اثرات سے بچاو اور حفاظتی تدابیر بارے عوام الناس میں موثر آگاہی فراہم کی جائے تاکہ زیادہ سے زیادہ شہریوں کو ہیٹ ویو کے مضر اثرات سے بچایا جا سکے۔انہوں نے مزید کہا کہ پی ڈی ایم اے کسی بھی ہنگامی صورتحال سے نمٹنے کے لیے ہمہ وقت تیار ہے۔
