اسلام آباد (این این آئی)وزیراعظم کے معاون خصوصی اورچیئرمین پاکستان علماء کونسل حافظ محمد طاہرمحموداشرفی نے اپیل کی ہے کہ عدالت عظمیٰ کے ججزموجودہ آئینی بحران کی کیفیت کے خاتمہ کیلئے اقدامات اٹھائیں،عالمی دنیا، اقوام متحدہ اوراوآئی سی کو کشمیر اورفلسطین کیلئے عملی اقدامات اٹھانا چاہیے۔
اتوار کویہاں پریس کانفرنس کرتے ہوئے انہوں نے کہاکہ امت مسلمہ اضطراب میں ہے، فلسطین میں ظلم وستم جاری ہے،مسئلہ فلسطین پرعملی اقدامات اٹھانے کی ضرورت ہے۔انہوں نے کہاکہ پاکستان کی ریاست اور عوام کی فلسطین کے ساتھ محبت اورموقف میں کوئی تبدیل نہیں کرسکتا۔ انہوں نے کہاکہ وزیراعظم خودکہہ چکے ہیں کہ پاکستان کے اسرائیل کے ساتھ تجارتی تعلقات نہیں ہے۔انہوں نے کہاکہ امت مسلم اورہمارے مسائل کاحل وحدت اوراتحاد میں ہے۔ ، نوجوان نسل کو انتہاپسندانہ رویے سے بچانے کیلئے اقدامات کرنا ہوں گے۔انہوں نے کہا کہ پہلے عدلیہ کی طرف لوگ دیکھتے تھے ، سیاسی قائدین کی طرف دیکھتے تھے، آج مذاکرات کی ٹیبل پرکوئی بیٹھنے کیلئے تیارنہیں ہے۔ انہوں نے کہاکہ عدلیہ میں جوکچھ ہورہاہے وہ قوم کیلئے تکلیف دہ ہے۔ معاون خصوصی نے کہاکہ شرعی اصول کہتے ہیں کہ قاضی پرموسم کے اثرات نظرانداز نہیں ہونا چاہیے ، چیف جسٹس سے اپیل ہے کہ وہ اپنے ساتھیوں کے ساتھ بیٹھ کرمسائل کوحل کریں۔
