لاہور (این این آئی) پاکستان مسلم لیگ (ن) کی سینئر نائب صدر و چیف آرگنائزر مریم نواز نے کہا ہے کہ الیکشن سیلیکٹ ہو کر آنے والے کے لئے بھیانک ہوں گے ہم تو اللہ اور عوام کی طاقت سے جیت کر آتے ہیں، جس فیصلے کو سپریم کورٹ کے ججز کی اکثریت نہیں مان رہی، ہم سے کہا جا رہا ہے وہ فیصلہ مانو۔انہوں نے سماجی روابط کی

ویب سائٹ ٹوئٹر پر الیکشن شیڈول کے اعلان پر اپنے ردعمل کا اظہار کرتے ہوئے کہا کہ یہ ہمارے لیے بھیانک نہیں، ہم تو اللہ اور عوام کی طاقت سے جیت کر آتے ہیں۔ بھیانک تو انکے لیے جو آر ٹی ایس بٹھا کر، سیلیکٹ ہو کر آتے ہیں اور جو سہولت کاروں کے بغیر لنگڑے لولے ہو جاتے ہیں مگر نوٹ فرما لیجیے یہ 2018ء نہیں اور نا ہی نظام فیض کے شکنجے میں ہے! Bring it on!۔ مریم نواز نے کہا کہ جس فیصلے کو سپریم کورٹ کے ججز کی اکثریت نہیں مان رہی، ہم سے کہا جا رہا ہے وہ فیصلہ مانو! وہ فیصلہ جس کو معزز جج صاحبان فیصلہ ہی ماننے سے انکاری ہیں، اس کو قوم پر مسلط کیا جا رہا ہے! یہ پہلی بار سنا ہے۔انہوں نے ایک اور ٹوئٹ میں کہا کہ مسجد اقصی اور غزہ پر اسرائیل کے حملے فلسطینیوں کی زندگیوں اور عبادتوں پر ایک بے رحمانہ حملہ ہے۔ انسانی حقوق کی کھلی خلاف ورزی جو بین الاقوامی برادری سے فوری کارروائی کا مطالبہ کرتی ہے۔ دکھ اور درد کی اس گھڑی میں ہم اپنے بھائیوں اور بہنوں کے ساتھ کھڑے ہیں۔مریم نواز کی جانب سے ٹوئٹ کے ساتھ آزاد فلسطین کا ہیش ٹیگ استعمال کیا گیا۔