لاہور (این این آئی) ایک اور ٹریفک وارڈن نے پی ایچ ڈی کی ڈگری مکمل کرلی۔ٹریفک وارڈن آصف اقبال نے نجی یونیورسٹی سے ریاضیات میں ڈاکٹریٹ کی ڈگری حاصل کی۔ چیف ٹریفک آفیسر لاہور کیپٹن(ر) مستنصر فیروز نے آصف اقبال کو مبارکباد، تعریفی سند کا اعلان کرتے ہوئے کہا کہ

وارڈنز کا ڈیوٹی کے ساتھ ساتھ تعلیمی سرگرمیاں جاری رکھنا خوش آئند ہے، محدود وسائل اور سخت نوکری کے باوجود تعلیم جاری رکھنا قابلِ ستائش ہے۔ انہوں نے بتایا کہ 24سو وارڈنز میں سے 145 وارڈنز ایم فل ڈگری جبکہ 04وارڈنز ڈکٹریٹ ڈگری ہولڈرز ہیں، 80فیصد وارڈنز نے مختلف مضامین میں ماسٹرز کئے ہوئے ہیں، سٹی ٹریفک پولیس کو تعلیمی قابلیت میں سب فورسز پر سبقت ہے،ٹریفک وارڈنز نے فرانزک سائنس، مالیکیولر بیالوجی، انگلش لڑیچر کی ڈگریاں حاصل کی کیں ہوئیں ہیں۔ٹریفک وارڈنز قانون، اکنامکس، ریاضیات، کریمنالوجی، انٹرنیشنل ریلیشنز میں ایم فل کئے ہوئے ہیں۔ انہوں نے بتایا کہ ایم فل کی ڈگری رکھنے والے وارڈنز کو ہرماہ پانچ ہزار روپے الاؤنس دیا جارہا ہے، پی ایچ ڈی کی ڈگری رکھنے والوں کو دس ہزار روپے اضافی الاؤنس دیا جارہا ہے، ٹریفک وارڈنز کی ویلفیئر کو ہرممکن یقینی بنایا جارہا ہے۔سی ٹی او لاہور نے تمام وارڈنز کو تعلیمی میدان میں مکمل سپورٹ کرنے کا اعلان کیا۔