پشاور(این این آئی) پشاور انسٹیٹیوٹ آف کارڈیالوجی جدید طریقہ علاج روٹا پرو ٹیکنالوجی متعارف کرنے والا پہلاپاکستانی ادارہ بن گیا۔ترجمان پی آئی سی کے مطابق پشاور انسٹیٹیوٹ آف کارڈیالوجی نے شاندار کامیابی حاصل کرتے ہوئے پاکستان میں پہلی بار جدید طریقہ علاج روٹا پرو ٹیکنالوجی کے60سالہ دل کے مریض کا کامیاب آپریشن کیا،
جس میں ماہر کارڈیالوجسٹ کی ٹیم نے کامیاب آپریشن کا حصہ بنے ، آپریشن ٹیم کی نگرانی پی آئی سی کے کارڈیالوجی ڈیپارٹمنٹ کے سرابراہ ڈاکٹر عابد اللہ نے کی۔ترجمان کے مطابق روٹاپرو ٹیکنالوجی ایک سنگل آپریٹر سمارٹ ڈیوائس ہے جو دل کی شریانوں کے اندر کیلشیم کو ہٹانے میں مدد دیتی ہے،روٹاپرو کے ذریعے دل کی ایسی بند شریانوں کا علاج ممکن ہوگا جو پہلے ممکن نہیں ہوتا تھا،جدید طریقے سے کم پیچیدگی اور زیادہ کامیابی کے ساتھ دل کے مریضوں کی انجیو پلاسٹی ممکن ہو گی، یہ ٹیکنالوجی دل کی شریانوں میں سخت تنگی سے سینے میں درد اور ممکنہ ہارٹ اٹیک کے علاج کے لیے استعمال ہوتی ہے۔ترجمان کے مطابق جدید طریقہ علاج چند ایشین ممالک میں استعمال کیا جاتا ہے، بوسٹن سائنٹیفک کمپنی اورپیک-ایم ٹی آئی کے اشتراک سے یہ شاندار کامیابی ممکن ہوئی ہے،پی آئی سی بہترین سہولیات اوراعلی تربیت یافتہ طبی عملے کے زیر نگرانی خیبر پختونخوا کے عوام کو بہترین علاج معالجے کا سلسلہ جاری رکھے گا، جدید طریقہ علاج صحت سہولت پروگرام کے ذریعے فراہم کیا جائے گا۔
