پشاور(این این آئی)پشاور کی مقامی عدالت نے سابق صوبائی وزیر معدنیات ضیاء اللہ آفریدی کو 50 لاکھ روپے جرمانہ کردیا ۔پشاور کی ایڈیشنل ڈسٹرکٹ اینڈ سیشن جج کی عدالت میں سابق صوبائی وزیر معدنیات ضیاء اللہ آفریدی سے متعلق ہتک عزت کیس کی سماعت ہوئی ۔ عدالت نے پرائیویٹ کمپنی کی جانب سے دائر ہتک عزت کا دعویٰ منظور کرتے ہوئے سابق صوبائی وزیر کو پچاس لاکھ روپے جرمانہ کردیا۔ عدالت نے سابق صوبائی وزیر کو بذریعہ اخبار معافی مانگنے کا بھی حکم دیا۔دعویٰ میں موقف اختیار کیا گیا تھا کہ سابق صوبائی وزیر معدنیات نے کمپنی کے خلاف بے بنیاد الزامات لگائے جس سے کمپنی کی ساکھ کو نقصان پہنچا ،الزامات سے 2018 میں چترال کے مقام پر معدنیات نکالنے کا کام بھی رک گیا تھا۔