اسلام آباد(این این آئی)وزیر دفاع خواجہ آصف نے کہا ہے کہ اگر کسی کو بسانا ہے تو گالف کلب میں بسائیں ،غریبوں کی بستیوں پر بلڈوزرکیوں چلاتے ہیں۔میڈیا سے گفتگو کرتے ہوئے خواجہ آصف نے کہا کہ ایف بی آر کا ریکارڈ دیکھ لیں ، ادارے ریونیو جمع کرنے میں ناکام ہیں البتہ ہمارا آئی ایم ایف سے معاہدہ ہوا اور ڈیفالٹ کاخدشہ نہیں۔انہوں نے کہا کہ ملک کی آدھی آبادی غربت اور آدھی عیاشی کی زندگی گزار رہی ہے،بڑے بڑے ادارے اور کمپنیاں ڈیفالٹ ہو چکی ہیں، نام نہیں لوں گا جو چیزیں ملک کیلئے زرمبادلہ نہیں بنا رہیں ان کا کوئی حل سوچنا ہو گا۔وزیر دفاع نے کہاکہ4 ہزار روپے پر 1500 کنال پر مال روڈ پر گالف کلب دیا ہوا ہے، یہ غریبوں کی غربت کا مذاق اڑانے والی بات ہے، اگر کسی کو بسانا ہے تو گالف کلب میں بسائیں ،غریبوں کی بستیوں پر بلڈوزرکیوں چلاتے ہیں۔