نئی دہلی(این این آئی)پڑوسی ملک بھارت میں 11 سال بعد پاکستان کی مشہور اور ریکارڈ توڑ بزنس کرنے والی فلم دی لیجنڈ آف مولاجٹ کی ریلیز کی تمام تر تیاریاں مکمل کر لی گئیں۔

بھارت کی انٹرٹینمنٹ کمپنی INOX Leisureکے چیف پروگرام راجیندر سنگھ جیالا نے بھارتی میڈیا کو بتایا کہ بھارت میں 30 دسمبرکو فواد خان اور ماہرہ خان کی فلم دی لیجنڈ آف مولا جٹ ریلیز کی جا سکتی ہے، فلم بھارتی پنجاب اور دہلی کے متعدد تھیٹرز ( جہاں پنجابی بولنے والے افراد بڑی تعداد میں مقیم ہیں ) میں ریلیز کی جائیگی۔بھارتی میڈیا کے مطابق پی وی آر سنیما کے انسٹاگرام پیج پر فلم کی ریلیز کے حوالے سے آفیشیل اعلان بھی کیا گیا تاہم اس پوسٹ کو جلد ہی پیچ سے ڈیلیٹ کر دیا گیا۔پوسٹ میں فلم کا پوسٹر شیئر کرنے کیساتھ ساتھ فلم کی جمعہ کو ریلیز کے حوالے سے اعلان درج تھا۔واضح رہے کہ جیو فلمز کی پیشکش، انسائیکلو میڈیا اور لاشاری فلمز کا شاہکار دی لیجنڈ آف مولاجٹ تقریباً 200 کروڑ کا بزنس کرچکی ہے تاہم دل ابھی بھرا نہیں کیونکہ پکچر ابھی باقی ہے اور فلم کی کامیابیوں کا سلسلہ بھی جاری ہے۔

موضوعات:دی لیجنڈ آف مولاجٹ