لاہور( این این آئی)کائونٹر ٹیرر ازم ڈیپارٹمنٹ نے دہشت گردی کی حالیہ لہر کے پیش نظر بڑا آپریشن کر کے کالعدم تنظیموں کے سات دہشت گرد وں کو گرفتار کر کے ان کے قبضے

سے بارودی مواد ،اسلحہ اور ممنوعہ لٹریچر برآمد کر لیا ۔ سی ٹی ڈی کے ترجمان کے مطابق دہشتگردی کی حالیہ لہر کے پیش نظر مختلف مقامات پر خفیہ اطلاعات پر آپریشنز میں تیزی لائی گئی ہے ۔ ترجمان کے مطابق ایک بڑے آپریشن میں کالعدم تنظیموں سے وابستگی رکھنے والے 7دہشتگردوں کو گرفتا ر کیا گیا ہے جن کی شناخت خالد محمود ، محسن وقار ، محمد عثمان ، شیر محمد ، لقمان رفیق اور فاروق کے ناموں سے ہوئی ہے ۔ ترجمان کے مطابق دہشتگردوں کے قبضے سے بارودی مواد ، اسلحہ، ممنوعہ لٹریچر برآمد ہوا ہے۔ملزمان صوبے کے حساس شہروں میں دہشتگردی کی منصوبہ بندی میں ملوث ہیں ۔ ترجمان کے مطابق رواں ہفتے مختلف شہروں میں 443 کومبنگ آپریشن کیے گئے اور اس دوران 19 ہزار 630 مشتبہ افراد کو چیک کیا گیا ۔90 افراد کو کالعدم تنظیموں سے تعلق رکھنے پر گرفتار کیا گیا ۔