اسلام آباد(این این آئی)وزیراعظم شہباز شریف کے داماد ہارون یوسف عزیز نے حفاظتی ضمانت کیلئے اسلام آباد ہائیکورٹ سے رجوع کرلیا۔ ہارون یوسف عزیز شہباز شریف کے خلاف آمدن سے زائد اثاثوں کے کیس میں شریک ملزم کے طور پر نامزد ہیں۔اسلام آباد ہائی کورٹ میں دی گئی درخواست میں موقف اختیار کیا گیا ہے کہ احتساب عدالت لاہور میں ریفرنس نمبر22/2020زیر سماعت ہے۔ احتساب عدالت لاہور میں پیش ہونے کیلئے 2ہفتوں کی حفاظتی ضمانت منظور کی جائے ۔دریں اثنا اسلام آباد ہائیکورٹ سے 2مختلف کیسز میں سلیمان شہباز کی حفاظتی ضمانت کے معاملے پر سلیمان شہباز کی جانب سے ضمانتی گلزار احمد نے اسلام آباد ہائیکورٹ میں ضمانتی مچلکے جمع کرا دئیے ہیں۔ ایف آئی اے اور نیب کے کیس میں 25,25 ہزار روپے کے ضمانتی مچلکے جمع کرائے گئے ہیں۔