راولپنڈی(این این آئی)پاکستان اور انگلینڈ کے درمیان پہلے کرکٹ ٹیسٹ میچ کے پہلے روز انگلینڈ کی ٹیم نے 4وکٹوں کے نقصان پر 506رنز بنالیئے،پاکستانی باؤلر انگلش بیٹرز کے سامنے بے بس نظر آئے،ا نگلینڈ کی جانب سے زیک کرولی،بین ڈکٹ،اولی پوپ اور ہیری بروک نے سنچریاں سکور بنا ڈلیں،ہیری بروک 101 رنز

اور بیناسٹوکس 34 رنز کیساتھ ناٹ آؤٹ ہیں، پاکستان کی جانب سے زاہد محمود نے دو جبکہ حارث رؤف اور محمد علی نے ایک،ایک وکٹ حاصل کی جبکہ انگلینڈ نے راولپنڈی ٹیسٹ میں کرکٹ کا 112 سالہ ریکارڈ بھی توڑ دیا،راولپنڈی میں انگلینڈ نے کھیل کے پہلے دن سب سے زیادہ رنز کا ریکارڈ بنادیا،اس سے قبل 1910 میں آسٹریلیا نے جنوبی افریقا کیخلاف پہلے دن 494 رنز بنائے تھے۔تفصیلات کے مطابق پنڈی کرکٹ سٹیڈیم میں سب سے پہلے ٹرافی کی رونمائی کی گئی،بعدازاں انگلینڈ کے کپتان بین اسٹوکس نے ٹاس جیت کر پہلے بیٹنگ کا فیصلہ کیا۔انگلینڈکی طرف سے بین ڈکٹ اور زیک کرولی نے بیٹنگ جبکہ پاکستان کی جانب سے نسیم شاہ اور محمد علی نے باؤلنگ کا آغاز کیا۔انگلینڈ نے پہلی وکٹ کی شراکت میں 233 رنز بنائے،اس موقع پر بین ڈکٹ 107 رنز بنا کر زاہد محمود کی گیند پر ایل بی ڈبلیو آؤٹ ہو گئے جس کے بعد اولی پوپ بیٹنگ کیلئے آئے،مجموعی سکور میں دو رنز کے اضافے کے بعد دوسرے اوپنر زیک کرولی 122رنز بناکر حارث رؤف کی گیند پر بولڈ ہو گئے۔یہ حارث رؤف کی پہلی ٹیسٹ وکٹ تھی۔اس موقع پر جوئے روٹ بیٹنگ کیلئے آئے،286 رنز کے مجموعی سکور پر انگلینڈ کی تیسری وکٹ گر گئی،جوئے روٹ 23 رنز بناکر زاہد محمود کی گیند پر ایل بی ڈبلیوآؤٹ ہو گئے۔ان کے بعد ہیری بروک بیٹنگ کیلئے آئے،462 رنز کے مجموعی سکور پر انگلینڈ کی چوتھی وکٹ گر گئی،

اولی پوپ 108 رنز بناکرمحمد علی کی گیند پر ایل بی ڈبلیو آؤٹ ہوئے،یہ محمد علی کی پہلی ٹیسٹ وکٹ ہے۔اس موقع پر انگلینڈ کے کپتان بین اسٹوکس بیٹنگ کیلئے آئے۔قبل ازیں انگلینڈ نے اپنے 100رنزبغیر کسی نقصان کے 13اعشاریہ 5 اوورز میں، 200رنز بغیر کسی نقصان کے 30اعشاریہ ایک اوورز میں، 300رنز 49اعشایہ 2 اوورزمیں تین وکٹوں کے نقصان پر،400 رنز 64 اوورز میں

اور500 رنز 74اعشاریہ 4 اوورز میں مکمل کئے۔انگلینڈ کی ٹیم نے پہلے روز کھانے کے وقفے پربغیر کسی نقصان کے 174 رنزجبکہ پہلے روز چائے کے وقفے ہر3وکٹوں کے نقصان پر 332رنز بنائے پہلے روزکھیل کے اختتام پر ا نگلینڈ نے 4 وکٹوں کے نقصان پر 506 رنز بنالئے۔ہیری بروک 101 رنز اور بین اسٹوکس 34 رنز کیساتھ ناٹ آؤٹ ہیں۔پاکستان کی جانب سے زاہد محمود نے دو جبکہ حارث رؤف اور محمد علی نے ایک،ایک وکٹ حاصل کی۔

موضوعات:راولپنڈی ٹیسٹ