لاہور( این این آئی)عوامی مسلم لیگ کے سربراہ و سابق وزیر داخلہ شیخ رشید احمد نے کہا ہے کہ عمران خان نے تنہا13پارٹیوں کی سیاست دفن کردی ،اسمبلیاں تحلیل ہوگئیں توایک سال میںدو انتخابات کے نہ پیسے ہیں نہ منصوبہ بندی ہے، گوٹی پھنس گئی ہے۔

ٹوئٹر پر جاری اپنے بیان میں شیخ رسید نے کہا کہ 77وزرء اخزانے پر بوجھ ہیں،8مہینے سے فاقہ کشی ،مہنگائی اوراب آئی ایم ایف کا جواب ہے ،جو لندن دوائی لینے گئے تھے وہ نیوائیر کی چھٹیاں منارہے ہیں ،الٹی گنتی شروع ہو گئی ہے اور جی کاجاناٹھہرگیاہے ۔ انہوں نے کہاکہ چار ماہ سے پنجاب اسمبلی کااجلاس جاری ہے اس لیے عدم اعتماداورگورنرراج ناممکن ہیں، حکومت میں آنے اور اس کو لانے والے دونوں پشیمان ہیں۔ انہوںنے کہاکہ فضل الرحمن کے بیان نے اس کو رسواکردیا،چھڑی بدل گئی ،30جنوری تک انتخابات کی گھڑی بھی بدل جائے گی،معیشت ہی قومی سلامتی ہے جس پر کوئی خاموش تماشائی نہیں رہ سکتا۔شیخ رشید نے کہا کہ پی ڈی ایم کا موقف تھا کہ صوبائی اسمبلیاں توڑیں تو الیکشن کرا دیں گے اب کہہ رہے ہیں کہ اسمبلیاں نہ توڑیں اور وقت پورا کریں۔انہوں نے کہا کہ اب ملکی معیشت اس جگہ پہنچ گئی ہے کہ اب یا کبھی نہیں کاوقت آگیا ہے،آر یا پار ہوگا۔عمران خان 30جنوری تک نئے الیکشن کی تاریخ لے لیگا، پی ڈی ایم کے لیے گیٹ نمبر4بند ہو گیا۔