اسلام آباد (آن لائن)پاکستان تحریک انصاف نے کہا ہے کہ جوائنٹ چیفس آف سٹاف کمیٹی مقرر ہونے پر جنرل ساحر شمشاد اور چیف آف آرمی سٹاف مقرر ہونے پر جنرل عاصم منیر کیلئے تمناؤں کا اظہار کرتے ہیں، ہم ملک کی سلامتی اور اداروں کے استحکام کیلئے ہر قدم اٹھانے کو تیار ہیں،ہماری توقع ہے نئی فوجی قیادت ملک میں آئینی حقوق

کی بحالی اور جمہوریت کے استحکام کیلئے اپنا کردار ادا کرے گی۔ تفصیل کے مطابق افواجِ پاکستان میں اعلیٰ عہدوں پر تقرریوں کے معاملہ پر پاکستان تحریک انصاف نے باضابطہ اعلامیہ جاری کردیا۔اعلامیہ میں کہا گیا ہے کہ فوج کے نئے سربراہ کی تقرری کے ضمن میں صدر مملکت کا اعلامیہ سامنے آ چکا ہے۔تحریک انصاف کا مؤقف واضع ہے ہم ملک کی سلامتی اور اداروں کے استحکام کیلئے ہر قدم اٹھانے کو تیار ہیں۔گزشتہ آٹھ ماہ کے واقعات نے واضع طور پر ملک میں تفریق پیدا کی۔ان آٹھ ماہ میں جو اقدامات اٹھائے گئے ان سے ملک اور اداروں کو شدید نقصان پہنچا۔پاکستان میں انسانی حقوق کی بدترین خلاف ورزی دیکھنے میں آ ئی۔صحافتی اداروں اور صحافیوں کو شدید دباؤ اور تشدد کا نشانہ بنایا گیا۔ارشد شریف جیسے نامور صحافی شہیدْکرْدئیے گئے، اعلامیہ تحریک انصاف میں کہا گیا ہے کہ ملک کی سب سے بڑی سیاسی جماعت اور ملک کے سب سے بڑے لیڈر عمران خان کو دیوار سے لگانے کی کوششوں کے نتیجے ملک بدترین سیاسی عدم استحکام کا شکار ہو گیا۔اس سیاسی عدم استحکام نے ملک میں شدید معاشی بحران کو جنم دیا۔فوج کی نئی قیادت سے ہماری توقع ہے کہ وہ ملک میں آئینی حقوق کی بحالی اور جمہوریت کے استحکام کیلئے اپنا کردار ادا کرے گی۔عوام کو نئے انتخابات کے ذریعے ملک کی نء قیادت چننے کے حق کو تسلیم کیا جائیگا۔عوام فوج سے توقع رکھتی ہے کہ بیرونی خطرات کے ساتھ اندرونی معاملات پر عوام کی توقعات کے مطابق غیر جانبدارانہ مؤقف اپناتے ہوئے سیاسی جماعتوں کے سیاسی حقوق سلب نہیں کئے جائینگے۔

اعلامیہ میں مزید کہا گیا ہے کہ ملک میں جاری بحران کا واحد حل نئے انتخابات ہیں۔پاکستان کا درد رکھنے والے تمام اداروں اور شخصیات کو انتخابات کے انعقاد میں اپنا کردار ادا کرنا چاہئے۔جوائنٹ چیفس آف سٹاف کمیٹی مقرر ہونے پر جنرل ساحر شمشاد اور چیف آف آرمی سٹاف مقرر ہونے پر جنرل عاصم منیر کیلئے تمناؤں کا اظہار کرتے ہیں۔

موضوعات:تحریک انصاف