بالاکوٹ (اے پی پی)بالاکوٹ میں بارش، بالائی علاقوں ناران بابو سر ٹاپ شوگران میں برفباری سےموسم شدید سرد ہوگیا ،پولیس نے ناران سے آگے بابو سر ٹاپ تک 4چوکیاں بھی ختم کردیں ،شاہراہ کاغان کو ناران سے آگے کے لئے بند کردیا ۔ڈیایس پی بالاکوٹ سراج خان نے بتایا کہ ناران سے آگے بٹّہ کنڈی بیسل گیٹی داسو بوڑاواہی میں قائم پولیس کی چوکیاں ختم کردی گی ہیں اور ناران سے آگے سیاحوں و مقامی افراد کو جانے سے روک دیا گیا ہے ۔ گلگت بلتستان سفر کرنے والے افراد شاہراہ کاغان کی بجائے شاہراہ قراقرم کا استعمال کریں اور ناران ویلی کے لئے آنے والے سیاح محکمہ موسمیات کی رپورٹ دیکھ کر ناران کا سفر کریں۔ ناران سے آگے جانے پر پابندی اس وجہ سے لگائی گئ کہ بارش و برفباری کے باعث کوئی نقصان نہ ہو ۔محکمہ موسمیات کے مطابق بارش کا سلسلہ جمعرات تک وقفہ وقفہ سے جاری رہنے کا امکان ہے۔