اسلام آباد(این این آئی)پاکستان تحریک انصاف کے سیکریٹری جنرل سلمان اکرم راجہ نے کہاہے کہ سہیل آفریدی کی جانب سے لانگ مارچ کا اعلان اب بھی برقرار ہے اور اس میں کوئی تبدیلی نہیں آئی ہے۔
اتوار کو خیبر پختونخوا میں گورنر راج اور ایمرجنسی کے نفاذ کے بعد اسلام آباد میں صحافیوں سے بات کرتے ہوئے سلمان اکرم راجہ نے کہا کہ لانگ مارچ کا جو اعلان سہیل آفریدی نے کیا تھا، اس میں کوئی تبدیلی نہیں آئی ہے،اب یہ آگے کیسے بڑھے گا، وہاں کیسے حالات ہیں،بربریت کی کیا نوعیت ہے وہ مقامی قیادت بہتر جانتی ہے۔
انہوں نے واضح کیا کہ ان کا فی الحال پی ٹی آئی کی صوبائی قیادت سے کوئی رابطہ نہیں ہے،ہم سیاسی لائحہ عمل اپنائیں گے، ہم سمجھتے ہیں کہ احتجاج کرنا عوام کا بنیادی اور آئینی حق ہے۔
