اسلام آباد (این این آئی)سابق وفاقی وزیر و پاکستان تحریک انصاف کے رہنما فواد چوہدری نے کہا ہے کہ وزیراعظم پہلے ٹی وی پر آکر الیکشن کا اعلان کریں پھرمذاکرات ہونگے۔اپنے بیان میں فواد چوہدری نے کہاکہ نوازشریف کہتے ہیں ہمارے ساتھ 2 ہزارلوگ ہیں ہماری بات نہ مانی جائے،

اگرہمارے پاس اتنے کم بندے ہیں توآپ کوکیا خوف ہے؟ اگر2 ہزار لوگ ہیں تو ہمیں آنے دیں ڈرکیوں رہے ہیں؟انہوںنے کہاکہ نوازشریف کے بھائی کی پاکستان میں حکومت ہے مگروہ پاکستان نہیں آرہے، شہبازشریف کی فیملی ان پراعتبارنہیں کررہی توسرمایہ کارکیا اعتماد کریں گے؟۔فواد چوہدری نے کہا کہ ہمارا مطالبہ ہے صاف اورشفاف انتخابات کرائے جائیں، اتوار تک اسلام آباد پہنچنا ممکن نہیں۔انہوںنے کہاکہ وزیراعظم پہلے ٹی وی پر آکرالیکشن کااعلان کریں پھر مذاکرات ہونگے۔ دریں اثناء مریم نواز کی پریس کانفرنس پر رد عمل کا اظہار کرتے ہوئے فواد چوہدری نے کہاکہ پے درپے ہونے والی پریس کانفرنسز اور پھولی ہوئی سانسیں حقیقی آزادی مارچ کی کامیابی کا پیش خیمہ ہیں، حقیقی آزادی مارچ ناکام ہے تو مجرموں کے حکمران گروہ کی کانپیں کیوں ٹانگ رہی ہیں۔ سابق وزیر نے کہاکہ آزادی مارچ کے مناظر دیکھ کر مریم کے پاپا کے پلیٹ لیٹس پھر سے تیزی سے گِر رہے ہیں، اب تو چچا کی حکومت ہے، مریم نواز ہمت کریں اور پاپا کو لیکر وطن واپس پہنچیں۔ انہوںنے کہاکہ آزادی مارچ سے خطرہ نہیں تو 41 روپے کی گرانٹ دینے، دارالحکومت کے باہر سے ہزاروں پولیس، ایف سی اور رینجرز اسلام آباد میں جمع کرنے کی ضرورت کیوں پیش آئی؟۔ انہوںنے کہاکہ مریم کے والد کا ’’مجھے کیوں نکالا‘‘ مارچ گھنٹوں میں ہوا میں تحلیل ہوا۔ انہوںنے کہاکہ پوری قوم عمران خان کے بیانیے کی پشت پر کھڑی، ملک کے طول و عرض سے قافلے حقیقی آزادی مارچ کا حصہ بننے کیلئے نکل رہے ہیں۔