لاہور (آئی پی ایس )پی ٹی آئی کے رہنما فواد چوہدری نے بینر اتارنے پر اپنے ہی رکن پنجاب اسمبلی یاور کمال کے خلاف مقدمہ درج کرادیا۔پی ٹی آئی کے مارچ کے دوران بہت سے واقعات سامنے آئے جس میں پارٹی کے اندرونی اختلافات سامنے آگئے، کہیں رہنما آپس میں لڑ پڑے، تو کہیں کارکن گھتم گتھا نظر آئے۔
جب کہ جذباتی تقریریں اور اشتعال انگیز بیانات دینے والے عمران خان اپنے کھلاڑیوں کو متحد رکھنے میں ناکام نظر آئے۔پہلے روز اسد عمر کی حماد اظہر اور پی ٹی آئی لاہور کے صدر امتیاز شیخ کی آپس میں چپقلش کی ویڈیو سامنے آئی تھی، اور یہ تمام واقعہ عمران خان کے سامنے پیش آیا۔ دوسرے روز حماد اظہر کی فیصل جاوید سے مائیک چھیننے کی ویڈیو وائرل ہوئی، اس میں بھی عمران خان عینی شاہد تھے، جب کہ متعدد مقامات پر پی ٹی آئی کارکنان کے آپس میں گھتم گتھا ہونے کے واقعات سامنے آئے۔اب کپتان کے کھلاڑیوں کی لڑائی مقدموں تک پہنچ گئی ہے، اور تحریک انصاف کے سینئر رہنما فواد چوہدری نے اپنی ہی جماعت کے رکن پنجاب اسمبلی یاور کمال کے خلاف مقدمہ درج کرادیا ہے۔ذرائع کے مطابق فواد چوہدری اور ممبر پنجاب اسمبلی یاور کمال کے درمیان بینر اتارنے پر جھگڑا ہوا، اور فواد چوہدری نے اپنے بینراتارنے پر یاور کمال کو مقدمے میں نامزد کردیا ہے۔اس حوالے سے تحریک انصاف کے رکن پنجاب اسمبلی یاور کمال کا کہنا ہے کہ فلیکسز اتارنے کا معاملہ بالکل مضحکہ خیز ہے، میری فلیکس اتار کر فواد کی لگائی گئی تھی، اور ہم نے اتار کر اپنی لگا دی۔دوسری جانب مرید کے جاتے ہوئے پی ٹی آئی کارکنوں میں لڑائی کی ویڈیو سامنے آئی، جہاں کرسیاں چل گئیں، اور کھلاڑیوں کی ایک دوسرے کو گالیاں دیں اور کپڑے تک پھاڑ دیئے۔
