پرتھ ( این این آئی) پاکستان اور زمبابوے کے درمیان پرتھ میں کھیلے گئے میچ کے آخری لمحات کی کمنٹری باکس کی ویڈیو جاری کردی گئی۔سنسنی خیز مقابلے کے دوران پاکستان کے بازید خان اور زمبابوے کے پومی مبانگوا کمنٹری کر رہے تھے۔

میچ کی فیصلہ کن آخری گیند پر پومی مبانگوا کو کمنٹری کے دوران بیک وقت خوشی اور ٹینشن میں دیکھا گیا۔ویڈیو میں دیکھا جاسکتا ہے کہ بازید خان اس دوران خاموش رہے اور ان کے چہرے اور باڈی لینگویج سے مایوسی کا اندازہ لگایا جاسکتا ہے۔پومی مبانگوا 1996ء سے 2002 ء کے درمیان 15 ٹیسٹ اور 29 ون ڈے انٹرنیشنل میچوں میں زمبابوے کی نمائندگی کرچکے ہیں۔حیران کن طور پر پومی مبانگوا نے 1996 ء میں انٹرنیشنل ٹیسٹ اور ون ڈے فارمیٹ میں ڈیبیو بھی پاکستان کے خلاف کیا تھا۔واضح رہے کہ جمعرات کے روز ٹی ٹونٹی ورلڈکپ 2022ء میں گروپ ٹو کے اہم میچ میں زمبابوے نے پاکستان کو سنسنی خیز مقابلے کے بعد ایک رن سے شکست دی تھی۔