میڈرڈ ( اےایف پی) اسپین میں پولیس نے ایک پاکستانی جوڑے کو گرفتار کیاہے جس پر الزام ہےکہ اس نے پاکستان میں اپنی ہی بیٹی کو اس لیے قتل کر دیا تھا کیونکہ بیٹی نے ان کی منظوری کے بغیر شادی کر لی تھی،گرفتاری انٹرنیشنل وارنٹ جاری ہونےپر کی گئی، جوڑاڈی پورٹ ہونے تک جیل میں رہےگا۔

غیرملکی خبررساںادارے کےمطابق اسپین کی نیشنل پولیس نے ایک بیان میں کہا ہےکہ پاکستانی حکام نے اپریل 2020 میں ہونے والے قتل کے بعد جوڑے کے لیے بین الاقوامی وارنٹ گرفتاری جاری کیے تھے،بیان میں مزید کہا گیا کہ تفتیش کاروں کا خیال ہے کہ جوڑے نے ’’اپنی ہی بیٹی کو پاکستان میں اغوا کیا اور پھر قتل کیا کیونکہ اس نے ایک ایسے شخص سے شادی کی جسے وہ پسند نہیں کرتے تھے۔‘‘ہسپانوی پولیس نے 67 سالہ مرد اور 51 سالہ خاتون کو ہفتے کے روز لاریوجا کے دارالحکومت لوگرونو میں ان کے گھر کے قریب سے گرفتار کیا، پاکستانی حکام کی جانب سے اس اطلاع پر کہ وہ اب وہاں رہ رہے ہیں۔گرفتاری کے بعدجوڑے کو اسپین کی قومی عدالت میں پیش کیاگیا جس نے حکم دیا کہ انہیں پاکستان ڈی پورٹ ہونے تک جیل میں رکھا جائے۔یہ جوڑا لوگرونو کے وسط میں فون اور انٹرنیٹ خدمات پیش کرنے والی ایک دکان چلاتے ہیں۔قومی ادارہ شماریات INE کے مطابق تقریباًایک لاکھ پاکستانی اسپین میں مقیم ہیں