اسلام آباد(این این آئی)سابق وفاقی وزیر اطلاعات و پاکستان تحریک انصاف کے رہنما فواد چوہدری نے سابق وزیراعظم نواز شریف کی لندن پریس کانفرنس پر ردعمل کا اظہار کرتے ہوئے کہاہے کہ نواز شریف کی پریس کانفرنس چارج شیٹ ہے، رجسٹرار سپریم کورٹ اور آئی ایس پی آر جواب دیں۔

اپنی ٹوئٹ میں فواد چوہدری نے کہاکہ نواز شریف کی پریس کانفرنس اداروں کے خلاف چارج شیٹ ہے، ان کے تمام تر الزامات اداروں پر ہیں، بہتر ہو گا اس کا جواب رجسٹرار سپریم کورٹ اور آئی ایس پی آر دیں۔دریں اثناء ایک انٹرویو میں انہوںنے کہاک پانامہ پیپرز ہم لائے، نہ اس وقت ہم حکومت میں تھے اور نواز شریف، مریم کو ٹرائل مکمل ہونے تک گرفتار بھی نہیں کیا گیا۔انہوں نے کہا کہ نواز شریف بتائیں وہ کس ڈیل کے ذریعے پاکستان واپس آنے کی کوشش کر رہے ہیں؟ این آر او ہورہا ہے اور سسٹم خاموش ہے۔فواد چوہدری نے کہا کہ ادارے کرپٹ مافیا کے محافظ نہ بنیں، ملکی حفاظت اور سالمیت کے اقدام کریں۔ انہوںنے کہاکہ صدر اور وزیر اعظم کے دفاتر کی آڈیو لیکس ہو رہی ہیں۔فواد چوہدری نے کہاکہ اب این آر او 22 ہو رہاہے ، ان فیملیز کو 1100 ارب روپے جا رہے ہیں اور سسٹم خاموش ہے۔انہوںنے کہاکہ حسن نواز کس رائل فیملی کا پڑپوتا ہے ، کیا حسن نواز ایلون مسک کا بھائی ہے ، میری دعا ہے اب کوئی ایسا شخص ہو کہ جو ان رہنمائوں کے اثاثوں کی تفصیل سامنے لائے۔ فواد چوہدری نے کہاکہ انہوںنے کہاکہ رانا ثناء اللہ مفرور ہیں، اسلام آباد پولیس کا رانا ثنااللہ کو شیلٹر دینا کسی صورت جائز نہیں، رانا ثناء اللہ گرفتاری پیش کریں اور پھر ضمانت کرائیں۔