سیہون کی 5 یونین کونسلیں ڈوبنے کا خدشہ، مکینوں نے نقل مکانی شروع کر دی
اسلام آباد (این این آئی)پاکستان کی سب سے بڑی منچھر جھیل میں پانی کی سطح بلند ہونے سے بند ٹوٹنے کا خطرہ ہے
جس سے سیہون کی 5 یونین کونسلیں ڈوبنے کا خدشہ ہے اور سیلابی صورتحال کے پیش نظر مکینوں نے نقل مکانی شروع کر دی۔
منچھر جھیل میں تیز ہواؤں سے لہریں بلند ہونے لگی ہیں جس کے باعث بند پر دباؤ بڑھ گیا اور جھیل کا پانی کناروں سے چھلکنے لگاہے،
پانی اب دانستر ریگولیٹر کے دروازوں کے اوپر سے گزر نے لگا ادھر میہڑ اور جوہی شہر کے رنگ بندوں پر بھی پانی کا دباؤ بڑھ گیا ہے۔
مٹیاری کے قریب روہڑی کینال کے مقام چھنڈن شاخ کا ٹوٹنے والا گیٹ کئی گھنٹے بعد بھی نہ بن سکا،
چھنڈن شاخ پانی سے بھرگئی اور 4 مقامات پر اس سے پانی باہر نکلنے لگا ہے جبکہ انتظامیہ کی جانب سے پانی
دریائے سندھ میں ڈالنے کیلئے مشینیں لگا دی گئیں۔ چھنڈن شاخ میں شگاف سے مٹیاری شہر سمیت قومی شاہراہ زیر آب آنے کا خدشہ ہے۔
