ممبئی (این این آئی)بھارتی کرکٹ ٹیم کے سابق کپتان ویرات کوہلی کو سوشل میڈیا پر پاکستان کرکٹ ٹیم کے کپتان بابر اعظم سے دور رہنے کا مشور ہ دیا گیا۔ایشیا کپ کے آغاز سے قبل جب بھارتی ٹیم آئی سی سی گراؤنڈ میں پریکٹس کے لیے پہنچی تو پاکستانی ٹیم بھی موجود تھی، دونوں ٹیموں کے کھلاڑیوں نے ایک دوسرے سے ملاقات کی،
اس موقع پر سابق بھارتی کپتان ویرات کوہلی اور بابر اعظم کی ملاقات بھی ہوئی۔پاک بھارت ٹیموں کے دو مقبول کھلاڑیوں کی ملاقات کئی دن تک موضوع بنی رہی، دونوں نے ایک دوسرے سے مصافحہ بھی کیا تاہم اسی حوالے سے میمز کے ذریعے اب کہا جا رہا ہے کہ بابر اعظم ویرات کوہلی کی وجہ سے پرفارم نہیں کر پا رہے۔پرابشتا نامی صارف نے کہا کہ دونوں نے ہاتھ ملاکر اپنی فارمز کا تبادلہ کرلیا۔دوسری جانب کچھ صارفین بابر اعظم کی اچھی کارکردگی کے لیے دعا گو بھی ہیں۔ دوسری جانب پاکستان کے سابق ٹیسٹ کرکٹر اور تجزیہ کار سکندر بخت ہانگ کانگ کے خلاف کوئی نیا بولر نہ کھلانے اور شاہنواز دھانی کے ان فٹ ہونے پر پاکستان ٹیم مینجمنٹ پر برس پڑے اور کہا ہے کہ اتنی نالائق ٹیم مینجمنٹ نہیں دیکھی۔ ایک انٹرویومیں سکندر بخت نے کہا کہ اتنی نالائق ٹیم مینجمنٹ نہیں دیکھی، ہم یہاں پروگرام میں بیٹھ کر مینجمنٹ کو گائیڈ کر رہے ہیں کہ کسی اور بولر کو کھلاؤ،گرمی ہے کچھ بھی ہو سکتا ہے اور وہ ہوگیا۔سکندر بخت نے کہا کہ مجھے اس بات کا غصہ ہے کہ یہ بہت منطقی سی بات تھی کیونکہ ہانگ کانگ جیسی ٹیم جسے پاکستان نے 28 پر آل آؤٹ کیا کیونکہ 10 رنز ہم نے انھیں اضافی دئیے، آپ نے اس ٹیم کے خلاف بھی کسی اور بولر کو موقع نہیں دیا۔یاد رہے کہ ہانگ کانگ کے خلاف میچ میں شاہنواز دھانی ان فٹ ہو کر بھارت کے خلاف میچ سے باہر ہو گئے اس حوالے سے ترجمان پی سی بی کا کہنا ہے کہ شاہنواز دھانی کو ممکنہ طور پر سائیڈ اسٹرین انجری ہے اور اگلے 2 روز میں میڈیکل ٹیم ان کی انجری کا جائزہ لے گی جبکہ انجری کا جائزہ لینے کے بعد ان کی مزید دستیابی کا فیصلہ ہو گا۔
