اسلام آباد(مانیٹرنگ ڈیسک/آن لائن )پاک فوج کے خلاف ایک اور پروپیگنڈہ بے نقاب ہوگیا، آرمی چیف کے دورہ لندن سے متعلق تمام جھوٹ ریت کی دیوار ثابت ہوئے۔نجی ٹی وی اے آروائی کے مطابق قانون حرکت میں آتے ہی تمام گمراہ کن مہم کا پردہ چاک ہوگیا، ملتان کے رہائشی قانون کے طالبعلم مبین حیدر نے سچ اگل دیا، پاک فوج اور اداروں کیخلاف تضحیک آمیز پوسٹوں پر معافی مانگ لی۔

محمد مبین نے کہا کہ تسلیم کرتا ہوں ناسمجھی اور سیاسی وابستگی پر جو لکھا وہ درست نہیں تھا، اداروں کا احترام اور عزت ہم سب کا قومی فریضہ ہے، آئندہ ایسی غلطی دھرانے سے محتاط رہوں گا۔نوجوان نے کہا کہ مستقبل میں قومی اداروں کے خلاف کسی مہم میں حصہ نہیں لوں گا، دوبارہ ایسی پوسٹ کرنے پر ادارے قانونی ایکشن لینے کے مجاز ہونگے۔ دوسری جانب افواج پاکستان اور آرمی چیف جنرل قمر جاوید باجوہ کے خلاف سوشل میڈیا مہم میں تحریک انصاف کے مزید کارکنوں کے ملوث ہونے کے شواہد مل گئے ہیں جن کے خلاف ایف آئی اے سائبر کرائم ونگ کی کاروائی جاری ہے۔ ذرائع کا کہنا ہے کہ ایف آئی اے نے آرمی چیف کے خلاف فیک نیوز میں ملوث شخص کا بھی پتہ چلا لیا ہے،پی ٹی آئی کے ایک سپورٹرانجینئر نوید افضل نے سوشل میڈیا پر دعویٰ کیا تھا کہ آرمی چیف نے 14 اگست کی تقریب میں شرکت کی جو لندن کے سفارتخانے میں ہوئی تاہم سوشل میڈیا پر چلائی جانے والی ویڈیو آرمی چیف جنرل قمر جاوید باجوہ کے مئی 2021 میں ہونے والے دورہ یوکرین کی ہے،محمد نوید افضل سمندر پار پاکستانی اور پنجاب کے ضلع جھنگ کا رہائشی ہے، سوشل میڈیا پر منفی مہم چلانے والا محمد نوید افضل پی ٹی آئی کا کارکن ہے اور اس کو تحریک انصاف ٹویٹر اکاؤنٹ فالو کرتے ہیں، آرمی چیف کے حوالے سے پھیلائی جانے والی فیک نیوز کو 64k لوگوں نے like اور9kلوگوں نے ریٹویٹ کیا جن میں سے اکثریت PTI کی ہے۔ فیک نیوز کو بعض بڑے اکائونٹ نے ریٹویٹ بھی کیا۔ذرائع کا بتانا ہے کہ میڈیا پر نفرت انگیزخبریں سوچی سمجھی سازش کے تحت پھلائی جا رہی ہیں اور فوج اور عوام میں نفرت پیدا کرنے کی کوشش کی جا رہی ہے۔ ملک دشمن عناصر ایسی افواہوں کا بھرپور فائدہ اٹھاتے ہیں۔ قوم خصوصاً نو جوانوں سے ذمہ داری کی توقع کی جاتی ہے۔