لاہور (این این آئی)لاہور کے ہاکی اسٹیڈیم میں 13 اگست کی رات تحریک انصاف کے جلسے میں خواتین سے بدسلوکی کی ویڈیوز منظر عام پر آگئیں۔تحریک انصاف نے لاہور کے نیشنل ہاکی اسٹیڈیم میں جشن آزادی سے ایک روز قبل جلسہ کیا تھا اور اس

دوران خواتین سے بدسلوکی کا واقعات بھی دیکھنے میں آئے۔ واقعہ کی ویڈیو نجی ٹی وی چینل پر شیئر کی گئی ہے جس میں جلسے کے بعد خواتین سے بدتمیزی دیکھی جاسکتی ہے۔ویڈیو میں خواتین کو خود کو بچانے کیلئے گیٹ پر چڑھے ہوئے بھی دیکھا گیا جبکہ چینل کے مطابق گیٹ پر چڑھی خاتون پیشے سے وکیل ہیں جنہوں نے خود کو بچانے کے لیے گیٹ پر چڑھنا مناسب سمجھا اس حوالے سے چینل نے دعویٰ کیا کہ جلسہ ختم ہونے کے بعد پی ٹی آئی کارکنان خواتین پر چڑھ دوڑے اور مختص انکلیوڑر سے نکلنے کے بجائے خواتین کے انکلیوڑر میں گھس گئے، اس دوران انہیں شدید ہراساں کیا گیا۔ ویڈیو میں خواتین کو پریشا ن سی صورتحال میں دھکم پیل سے بچنے کی کوشش کرتے دیکھا گیا لیکن انہیں جگہ دینے کے بجائے پی ٹی آئی کارکنان دھکے دیتے رہے۔دوسری جانب ایک اور ویڈیو وائرل ہے جس میں تحریک انصاف کے کارکنوں کو یوم آزادی کے کیک کے لیے لڑتے دیکھا جاسکتا ہے۔سوشل میڈیا پر دعویٰ کیا جارہا ہے کہ یہ ویڈیو رحیم یار خان کے شہر لیاقت پور کی ہے جہاں کیک کے لیے پی ٹی آئی کارکنان آپس میں ہی لڑپڑے۔