پشاور(مانیٹرنگ ڈیسک ، این این آئی )پی ٹی آئی کے رکن صوبائی اسمبلی ملک لیاقت پر نامعلوم افراد نے حملہ کر دیا جس کی زد میں آ کر بھائی، بھتیجا سمیت چار افراد جاں بحق ہو گئے۔میڈیا رپورٹس کے مطابق خیبرپختونخوا کے ضلع لوئر دیر کی تحصیل میدان میں ایم پی اے ملک لیاقت
آبائی علاقے جا رہے تھے راستے میں ان پر فائرنگ کی گئی۔پولیس کا کہنا ہے کہ نامعلوم افراد کی فائرنگ میں 4 افراد جاں بحق ہوگئے جن میں ایک پولیس اہلکار نصیر اور لیویز اہلکار بادشاہ شامل ہیں۔ جاں بحق ہونے والوں میں ایم پی اے ملک لیاقت کا بھائی جہان عالم اور بھتیجا یاسر بھی شامل ہیں۔پولیس کے مطابق فائرنگ سے ایم پی اے ملک لیاقت سمیت3 افراد شدید زخمی ہوئے جنہیں ڈسٹرکٹ ہیڈ کوارٹر ہسپتال تیمر گرہ منتقل کردیا گیا۔دوسری جانب ترجمان لیڈی ریڈنگ ہسپتال نے کہا ہے کہ گزشتہ روز لوئر دیر میں ہونے والے قاتلانہ حملے زخمی ہونے والے پاکستان تحریک انصاف کے رکن صوبائی اسمبلی ملک لیاقت خان کی مکمل صحتیابی سے متعلق کچھ کہنا قبل از وقت ہے۔تفصیلات کے مطابق پی ٹی آئی کے زخمی ایم پی اے ملک لیاقت خان لیڈی ریڈنگ اسپتال پشاور میں زیر علاج ہیں۔ترجمان لیڈی ریڈنگ ہسپتال کا کہنا ہے کہ ملک لیاقت خان کے پیٹ میں اور کندھے پر گولیاں لگیں، رکن صوبائی اسمبلی کا آپریشن کرکے انہیں وارڈ میں منتقل کر دیا گیا ہے۔ترجمان ایل آر ایچ کے مطابق ملک لیاقت مکمل ہوش میں نہیں ہیں، ان کی مکمل صحتیابی سے متعلق کچھ کہنا قبل از وقت ہو گا۔ہسپتال ترجمان نے بتایا کہ ایم پی اے کے ساتھ زخمی تین افراد بھی ہسپتال میں زیر علاج ہیں، زخمیوں میں ملک لیاقت خان کا بھتیجا حذیفہ بھی شامل ہے۔
