کراچی(این این آئی)سندھ ہائیکورٹ نے دعا زہرا کیس میں ظہیر کے بھائی شبیر و دیگر اہلخانہ کے بینک اکائونٹس اور شناختی کارڈ بحال کرنے کا حکم دے دیاہے۔جمعہ کوجسٹس محمد اقبال کلہوڑو کی سربراہی میں دو رکنی بینچ کے روبرو دعا زہرا کیس میں ظہیر کے بھائی
شبیر و دیگر اہلخانہ کے بینک اکائونٹس اور شناختی کارڈ بحال کرنے سے متعلق درخواست کی سماعت ہوئی۔درخواست گزار کے وکیل نے موقف دیا کہ جس درخواست پر فیصلہ ہوا وہ درخواست نمٹائی جا چکی، 8 جون کو درخواست نمٹائی گئی جبکہ وفاقی اور صوبائی حکومتوں کے لا افسران نے اکائونٹس بحال کرنے کی حمایت کر دی۔اسسٹنٹ اٹارنی جنرل نے موقف دیا کہ مقصد پورا ہوچکا، اکائونٹس بحال کرنے میں ہرج نہیں۔جسٹس محمد اقبال کلہوڑو نے ریمارکس دیے کہ کیس بڑا سادہ تھا، دعا زہرا بازیاب ہوچکی، بینک اکائونٹس اور شناختی کارڈ کا تفتیش سے کوئی تعلق نہیں۔عدالت نے ظہیر فیملی کے تمام بینک اکائونٹس اور شناختی کارڈ بحال کرنے کا حکم دے دیا۔ عدالت نے ریمارکس دیے کہ شبیر اور ظہیر کی والدہ کے بینک اکائونٹس اور شناختی کارڈ بحال کیے جائیں اور عدالت نے اپنا سابقہ حکم نامہ بھی واپس لے لیا۔عدالت نے اسٹیٹ بینک، نادرا اور سی آئی اے کو عدالتی حکم پر عمل درآمد کرنے کی ہدایت کر دی۔ سندھ ہائی کورٹ نے اس سے قبل اکائونٹس منجمد کرنے کی ہدایت دی تھی۔
