آرمی چیف کی زیر صدارت انتہائی اہم کور کمانڈرز کانفرنس
راولپنڈی(آن لائن)پاک فوج نے ملک میں سیلاب و بارشوں کی صورتحال کے پیش نظر امدادی و بحالی سرگرمیوں میں
سول انتظامیہ کی بھرپور مدد کے عزم کا اعادہ کیا ہے۔ پاک فوج کے شعبہ تعلقات عامہ آئی ایس پی آر کے مطابق
آرمی چیف جنرل قمر جاوید باجوہ کی زیر صدارت 249ویں کورکمانڈرز کانفرنس پیر کو جی ایچ کیو راولپنڈی میں منعقد ہوئی۔
کور کمانڈرز کانفرنس میں ملک کی مجموعی سیکیورٹی صورتحال بالخصوص سرحدوں اور داخلی سیکیورٹی کا جائزہ لیاگیا۔
آرمی چیف نے جاری انسداد دہشتگردی آپریشنز کی کامیابی کو سراہا اور سرحدوں کی سکیورٹی اور عوام کے تحفظ کو یقینی بنانے
کیلئے افسران اور جوانوں کی جانب سے جانوں کی قربانیاں دینے پر انہیں خراج عقیدت پیش کیا۔ آرمی چیف نے ملک میں
شدید بارشوں اور سیلاب کی صورتحال میں متاثرین کو درپیش چیلنجز سے نمٹنے کیلئے فارمیشنز کی امدادی کارروائیوں کو بھی سراہا۔
فورم نے اس عزم کا اعادہ کیا کہ امدادی و بحالی سرگرمیوں میں مسلح افواج سول انتظامیہ کی بھرپور معاونت جاری رکھیں گی۔
