دبئی (این این آئی)شادی کارڈ خراب ڈیزائن کرنے پر ہونے والی دلہن نے اپنے گرافک ڈیزائنر دوست سے دوستی ختم کر دی۔غیر ملکی میڈیا رپورٹس کے مطابق ایک خاتون نے سوشل میڈیا پر اپنے شادی کے کارڈ کی تصویر پوسٹ کی ہے
جو انہوں نے شادی میں اضافی اخراجات کے باعث پیسے بچانے کی خاطر اپنے گرافک ڈیزائنر دوست سے ڈیزائن کروایا تھا۔رپورٹ کے مطابق ہونے والی دلہن کا کہنا تھا کہ شادی سے چند دن قبل انتہائی سادگی سے ڈیزائن کیا ہوا شادی کارڈ دیکھ کر مایوسی ہوئی۔ان کا کہنا تھا کہ اس سے بہتر تو میری والدہ کارڈ ڈیزائن کر سکتی ہیں، جنہیں اس کام میں کوئی مہارت حاصل نہیں۔مذکورہ خاتون نے کہا کہ شادی کارڈ کا یہ نمونہ دیکھ کر معلوم ہوتا ہے کہ ڈیزائنگ پر بالکل کام نہیں کیا گیا، بس سادہ سے کاغذ پر دعوت نامہ تحریر کر دیا گیا ہے۔ہونے والی دلہن کا کہنا تھا کہ اس نے اپنے دوست کو پیسے دینے کا ارادہ کیا تھا لیکن کارڈ کے نمونے دیکھ کر ارادہ ترک کر دیا۔کئی سوشل میڈیا صارفین کا کمنٹس میں کہنا تھا کہ کارڈ کے بہتر ڈیزائن کے لیے تھوڑی رقم خرچ کرنی چاہیے تھی۔ایک صارف نے کہا کہ یہ کارڈ محبت سے نہیں بنایا گیا۔ایک اور صارف نے کہا کہ وہ اپنی شادی کا دعوت نامہ بنوانے کے لیے پیسے خرچ کر لیں گی لیکن کسی کو بھی کبھی فری میں ڈیزائن کرنے کا نہیں کہیں گی۔
