کراچی (این این آئی)سندھ بلوچستان میں بارشوں کے بعد کراچی کو پانی سپلائی کرنیوالا حب ڈیم مکمل بھر گیا ہے۔جی ایم واپڈا عامر مغل نے بتایا ہے کہ حب ڈیم مکمل 339فٹ بھر گیا ہے، ڈیم کا اضافی پانی حب ندی کے راستے سمندر میں گر رہا ہے۔عامر مغل نے کہا کہ حب ڈیم میں تین سال کا پانی ذخیرہ بھر چکا ہے، ندی میں مزید پانی روکنے کیلئے منصوبہ بنایا جا سکتا ہے۔واپڈا ذرائع کے مطابق حب ندی کے کنارے آباد لوگوں کو محفوظ مقامات پر منتقل کیا جا رہا ہے۔ حب ڈیم اور ندی کے اطراف سیکورٹی اہلکار تعینات کر دیے گئے ہیں، غیر متعلقہ افراد کو ڈیم اور ندی کی جانب جانے کی اجازت نہیں ہے۔اس سے قبل ڈیم 2007اور 2020میں بھرا تھا۔