حکومت مہنگائی کنٹرول کرنے میں مسلسل ناکام، شرح میں مزیداضافہ

کراچی (این این آئی) حکومت مہنگائی کنٹرول کرنے میں مسلسل ناکام رہی ہے، مہنگائی کی شرح میں مزید 1.32 فی صد اضافہ ہو گیا۔

تفصیلات کے مطابق ملک میں مہنگائی کا جن بے قابو ہو گیا، ہفتہ وار بنیادوں پر مہنگائی میں مزید ایک اعشاریہ 32 فی صد اضافہ ہو گیا ہے۔

ادارہ شماریات نے مہنگائی کی ہفتہ وار رپورٹ جاری کرتے ہوئے کہا ہے کہ ملک میں مہنگائی کی مجموعی شرح 33.66فی صد

کی سطح تک پہنچ گئی۔ادارہ شماریات کے مطابق ایک ہفتے میں 30 اشیائے ضروریہ کی قیمتوں میں اضافہ ہوا،

حالیہ ہفتے میں 5اشیا سستی، جبکہ 16اشیا کی قیمتوں میں استحکام رہا۔پیٹرول 6.36 فی صد اور ڈیزل 5.06 فی صد مہنگا ہوا،

ایل پی جی 2 عشاریہ 33 فی صد مہنگا ہوا۔گھی کا اڑھائی کلو کا ڈبہ 1.64فیصد اور آلو 2.57فی صد مہنگا ہوا،

لہسن کی قیمت میں 5.06فی صد اضافہ ہوا، انڈے، آٹا، دال چنا، دال مسور بھی مہنگی ہو گئی۔رپورٹ کے مطابق دہی،

چاول، چینی اور دودھ کی قیمتوں میں بھی اضافہ ہوا، جب کہ دوسری طرف ٹماٹر، پیاز، دال ماش اور کیلے سستے ہوئے۔