اسلام آباد (این این آئی) مسلم لیگ (ن)کے قائد سابق وزیر اعظم نواز شریف نے فوری طورپر وطن واپس نہ آنے کا فیصلہ کیا ہے اور انہیں مشورہ دیا گیا ہے کہ
وہ عام انتخابات سے پہلے وطن واپس آئیں جبکہ سابق وزیر خزانہ اسحق ڈار رواں ماہ کے آخری ہفتے میں وطن واپس آئیں گے ۔
ایک نجی ٹی وی نے اپنی رپورٹ میں دعویٰ کیاکہ میاں نوازشریف حالیہ چند ماہ میں وطن واپس نہیں آرہے ہیں اور اس سے پہلے بھی ڈاکٹرز نے انہیں مشورہ دیا تھا کہ
وہ اپنی صحت پر توجہ دیں اور جہاز کے ذریعے طویل سفرسے گریز کریں ۔ رپورٹ کے مطابق میاں نوازشریف آئندہ انتخابات سے پہلے وطن واپسی کا ارادہ رکھتے ہیں
اور وہ اس ضمن میں مسلم لیگ (ن) کی پاکستان میں موجود قیادت میں مسلسل ربطے میں ہیں جبکہ سابق وزیر خزانہ اسحاق ڈار نے اپنے وکلاء کو ہدایت کی کہ
وہ ان کی راہداری ضمانت کیلئے عدالت سے رجوع کریں اور وہ اس ماہ کے آخری ہفتے میں وطن واپسی کا فیصلہ کر چکے ہیں اور وطن واپس آتے ہی وہ بطور سینیٹر حلف اٹھائیں گے اور اس کے بعد انہیں وزیر خزانہ بنایا جائیگا ۔
